HAPSAY ug malinawon ang unang upat ka adlaw sa implementasyon sa executive order ni Mayor Edgardo Labella pagkontrolar sa mga tawo nga mobisita sa mga pribado ug publikong sam-ang sa dakbayan sa Sugbo.
Si Raquel Arce, pangulo sa Prevention Restoration Order Beautification Enhancement (PROBE), nagkanayon nga mingaw pa ang mga sementeryo sa unang upat ka adlaw nga implementasyon sa EO Number 92-A nga maoy nagmando pagsirado sa mga sementeryo sugod Oktubre 30 hangtod Nobiyembre 3.
Matod ni Arce nga gikan sa alas 6 sa buntag hangtod alas 8 sa gabii, adunay mga Probe personnel nga iyang gipabantay sa sementeryo aron maimplemetar ang EO ug mapatuman usab ang minimum health protocol batok Covid-19.
Niadtong Septiyembre 27 ug 28, naobserbahan ni Arce nga adunay daghang mga tawo nga ningbisita sa sementeryo, apan wa makaabot sa 30 porsyento nga gidaghanon o limit nga maoy nalatid sa kamanduan gikan sa City Government.
Si Konsehal Dave Tumulak, kinsa maoy gitudlo ni Labella isip ground commander, nagkanayon nga matag sementeryo, labi na sa Carreta ug Calamba nga maoy labing dagko nga public cemetery, aduna nay nakadestino nga mga pulis para maoy mopatunhay sa kahapsay ug kalinaw.
Sama sa naandan, sa mga mobisita sa sementeryo, kinahanglan nga magdala og quarantine pass.
Gidid-an gihapon ang mga nag-edad og 60 anyos pataas ug 21 anyos paubos sanglit epektibo gihapon para kanila ang stay at home order.
Ang pagsirado sa mga sam-ang buhaton sa tibuok nasod nga maoy kamandoan sa MalacaƱang. (PAC)