GISUGDAN sa Kagamhanan sa Dakbayan sa Sugbo ang paghawan sa mga spaghetti wire nga nangumbitay sa mga poste kapin sa duha ka mga semana na ang nakalabay. Ang mga wire ngil-ad tan-awon ug laksot nga talan-awon sa usa ka siyudad nga gitawag og queen city of the south.
Maayo nga lakang ang gihimo sa Siyudad tungod kay gawas nga bati nga tan-awon ang mga spaghetti wire, naghatag usab kini og kakuyaw sa mga motorista, labina sa two-wheeled nga mga sakyanan. Pipila pa lang ka tuig sukad namatay ang usa ka batan-ong lalake nga nabitik sa nagkombitay nga wire sa Dakbayan sa Talisay.
Laing gihimo sa Siyudad mao ang pagpakatap og mga team sa mga barangay aron manglimpyo sa mga kanal ug drainage systems sa piniling mga barangay nga dunay suliran sa pagbaha matag bunok sa uwan.
Kon nakapanglimpyo ang Siyudad sa mga spaghetti wire, mga kanal ug drainage system, di angay piyungan ang dagkong mga libaong, di lang sa gagmay nga mga dan, kon di sa mga main highway.
Maayo ra bag ordinaryo lang nga mga libaong, naay uban nga grabe ang giladmon nga nakamugna og pipila ka mga disgrasya sa mga motorsiklo nga niresulta sa pagkaangol sa pipila.
Bisan asa ka nga karsada karon sa siyudad sa Sugbo, gawas lang niadtong bag-ong gipangtrabaho sa Department of Public Works and Highways (DPWH), dako ang kahigayunan nga masulod ka sa mga libaong. Ang nakakuyaw sa ubang mga libaong nga lawom, di kini makita dayon panahon sa kagabhion samtang ang uban matabunan sa tubig kon mag-uwan. Mas nakapakuyaw kini sa mga disgrasya.
Gawas sa disgrasya, naghatag usab kini og kangil-ad sa imahe sa Siyudad sa Sugbo. Adunahan kuno, apan sa yano nga libaong wa makatagad.
Maayo unta kon mao kini ang isunod pagpatrabaho ni Mayor Edgardo Labella. Di huwaton ang DPWH nga maoy manapak kay bisan unsaon, tugkaran kini sa Siyudad.