Nalzaro: Nabuntog na ba ang Covid?

222922
222922

GIPAUBOSgihapon sa modified general community quarantine (MGCQ) ang tibuok lalawigan sa Sugbo hangtod sa katapusan ning buwan sa Oktubre. Maayo kining maong desisyon kay magpabilin gihapon ang restrictions. Hugot gihapon ang mga lagda aron dili mokatap ang kagaw. Kon paluagan god ang restrictions ug mokompiyansa kita, dia pa kining virus nagtuyoktuyok ug mas delikado nga mobalik pagsaka ang mga kaso.

Adunay daghang mga sugyot nga mobalik na sa normal gumikan kay miminus na ang mga kaso sa coronavirus disease (Covid-19). Ang uban nanghambog na man nga nagmadaugon na kita sa atong pagpakigbatok sa Covid-19. Daghan ang napurwesyo niining mga quarantine ug lockdowns. Dili na kini gani angay pang himuon sa atong kagamhanan, matod pa sa uban.

Sigurado kaha ning maong mga tawo o sektor nga gumikan kay nikunhod na ang mga kaso sa Covid-19, nagmadaugon na kita o mobalik na kita sa normal? Kining figures sa pagkunhod sa positive cases nga gipagawas karon, dili pa igo nga basihanan ug sukaranan nga mangangkon na kitang nagmadaugon batok ning maong kalibutanong hulga sa panglawas.

Mao ni gitawag nato nga overconfidence. Halos unom na ka mga buwan nga kita gi-lockdown tungod sa pandemya nga dala sa Covid-19. Ug dili nato kalikayan nga naghinamhinam na kita nga mobalik sa naandan o new normal. Ilabi na nga hayag na kaayo ang mga timaan nga posibleng mabuntog ang kagaw.

Apan mangutana kita: angay ba kitang magpadala karon sa nagsuyla natong kahinam nga mobalik na ta ngadto sa gitawag og new normal? O kaha i-anam-anan nato ang mga kalihokan sa hingpit nga pagbalik sa naandan. Di tingali maayo nga magpadala kita sa sobrang kompiyansa ning panahona kay kinabuhi ang atong gisugal sa atong pagpamasin. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph