PATAY ang duha ka mga giingong isnatser og selpon atol sa operasyon sa kapulisan alas 8:30 sa gabii, Miyerkules, Septyembre 30, sa Cotabato City.
Giila ang mga suspek nga sila si Norsalem Pasandalan Abdullah alyas Salem, minyo, nagpuyo sa Barangay Katuli, Sultan Kudarat sa Maguindanao Province ug Mohalid Abdul alyas Tato, nagpuyo sa nahisgutang dakbayan.
Gibutyag ni Cotabato City Police Office Director Colonel Richard Fiesta nga nagpahigayon sila og law enforcement operation uban ang militar batok sa grupo sa Iphone Gang.
Sa diha nga nasiplatan ang mga suspek sa mga pulis ug sundalo nga sakay sa usa ka motorsiklo, ila dayon kining gilutos.
Apan nanukol ang mga nahisgutang suspek hinungdan nga napatay.
Narekober sa mga pulis gikan sa mga suspek ang usa ka kalibre .45 nga pistola, mga bala ug mga cellphone nga kinawat.
Nasayran nga target sa mga suspek kadtong dunay mga Iphone ug isnaton pinaagi sa pagtion og armas ug kung mosukol patyon ang biktima.