SUPERBALITA DAVAO

2 na patay sa Covid sa Digos

SunStar file

GIBUTYAG sa City Health Office (CHO) sa Digos City nga duha na ang namatay sa coronavirus disease (Covid-19) sa maong dakbayan.

Sa abiso sa CHO niadtong Miyerkules, Septyembre 30, namatay ang 68-anyos nga lalaking negusyante human sab unang namatay ang pre-term nga batang lalaki di pa dugay.

Sa datos sa pasyente, Septyembre 16, dihang mitambong kini sa lamay sa iyang higala didto sa Padada, Davao del Sur.

Nasayran nga nianang pagka-ugma, nakasinati na og pag-ubo-ubo ang pasyente apan padayon pa gihapon siya sa inadlaw niyang buluhaton nga mao ang pagbisita sa iyang warehouse hangtud niadtong Septyembre 24.

Septyembre 25, dihang na-admit siya sa ospital ug nasuta sa x-ray nga adunay pneumonia ang pasyente hinungdan gipailawom sa swab test ug miguwang positibo ang resulta human sa duha ka adlaw.

Septyembre 30, nasayran nga namatay ang pasyente ug sa samang adlaw, nadugang sab nga positibo sa Covid-19 ang usa ka 64-anyos nga babayeng civil engineer.

Sumala sa CHO nga lumad sa dakbayan ang pasyente, apan didto na nanimuyo sa Better Living sa Parañaque City sukad 1986 ug naga-uli kanunay dinhi sa siyudad aron bisitahon ang mga kabanay.

Uwahing nakauli ang ginang niadtong Pebrero 2020 ug mibalik dayon sa kaulohang Manila una giimplementar ang lockdown.

Septyembre 21, dihang gihikay niini ang mga rekisitos sa ilang dapit aron makauli dinhi sa siyudad hangtud nga nakalupad padung Davao City niadtong Septyembre 28.

Human sa swab test nga gihimo didto sa Davao Airport milutaw nga positibo sa kagaw ang pasyente.

Sa kasamtangan, anaa sa 82 ang suspek sa sakit sa dakbayan ug usa ang probable nga kaso.

Misipa sab sa 80 ang kompirmadong kaso niini ug 56 ang nakarekober, 22 ang naospital, 26 ang anaa sa isolation unit ug 138 ang anaa sa strict home quarantine.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph