KAHADLOK karon ang gibati sa 25-anyos nga dalaga basin unya magkatag sa social media ang iyang video samtang naligo sa banyo nga hubo sa tanang sapot.
Ala 1:30 sa hapon niadtong Martes, Septyembre 29, 2020 nagpa-blotter sa Talomo Police Station si alyas Flor, taga Libungan, North Cotabato ug nag-abang og boarding house sa Times Beach, Barangay 76-A, Ecoland Davao City gumikan sa nahitabo kaniya.
Gisaysay ni Flor sa duty desk officer sa Police Station 3 nga samtang naa siya sud sa banyo kay maligo, gi-videohan sab diay siya sa iyang ka-boardmate nga si Marco, ulitawo.
Dihang nasiplatan ni Flor sa gamay nga bangag nga dunay nag-video kaniya, dali niya kining gigawas ug gikompronta si Marco sa gihimo niini.
Hinuon, gilayong gi-delete ni Marco ang na-record nga video, apan naguol gihapon si Flor basin unya ma-recover ang among video ug magkatag na hinuon sa social media.
Una niini, si Marco ug ang uban pang mga lalaki nga ka-boardmate sa reklamante, nagtagay og ilimnong makahubog, diin nakita si Flor nga nagtapis ug tualya nga misud sa kumon nila nga banyo.
Gipahimangnoan si Flor sa kapulisan nga ipatawag si Marco sa barangay aron didto kini mopasabot sa panghitabo ug aron sila mahusay.