SA kadtong “certified thrill-seekers” nga gustong mo-explore sa abunda ug makita ang mga nagkadaiyang matang sa marine life pinaagi sa scuba diving, freediving ug snorkeling ang lungsod sa Moalboal, lalawigan Sugbo ilakip sa inyong bucket list sa suroy.

Ang maong lungsod nahimutang sa habagatan-kasadpan nga bahin sa lalawigan sa Sugbo diin nag-atbang sa Tañon Strait nga makita ang probinsiya sa Negros habig sa kasadpan nga bahin sa baybayon.

Gibana-bana nga ang lungsod adunay gilay-on nga 89 kms. kon manukad sa dakbayan sa Sugbo ug moabot sa tulo ngadto sa upat ka oras nga biyahe pinaagi sa bus nga nahimutang sa South Bus Terminal, Cebu City nga mokantidad ang pletehan gikan sa P100 o P130 kon aircon bus.

Kon diving ang gipangita mas bintaha nga molahos sa Panagsama beach diin nahimutang ang mga naglumbay nga dive resort o accommodation alang sa temporaryong ka-istaran.

Sa kadtong baybayon ang ilang trip adunay lapad nga white sand beach sa Bas Daku area.

Gipatumang lagda

Resulta sa Covid-19 pandemic dili na susama kaniadto ang lahos-lahos nalang ang mga mangaligo ngadto sa dagat.

Gipahibawo ni Moalboal Mayor Paz Rozgoni ang mga local nga turista nga moduaw sa ilang lungsod ilabi na niadtong mangaligo sa dagat nga moagi una sa Tourism Office sa munisipyo aron nga mopa-rehistro ug molukat og “tourism pass” nga maoy ipakita ngadto sa pulis nga nagbantay sa checkpoint.

Matod pa nga ilang gilimitahan ngadto sa 300 ka tourism pass ang ilang ihatag sa mga mosuroy sa tuyo nga dili magpalabi og dagsa ang mga tawo sa baybayon.

Si Rozgoni adunay giluwatan nga executive order nga nagmando sa mga maglingaw-lingaw sa dagat nga kadtong “day use” gitugot lang gikan sa 7:00 sa buntag ngadto na sa 5:00 sa hapon ug wa nay gitugotan nga mag-overnight stay sa baybayon kon wa kiniy booking sa resort/cottage nga ilang puy-an.

Matod ni Rolie Alberite, tourism officer sa Moalboal, nga kon mo-booked og ka-istaran alang sa overnight stay gikinahanglan nga moagi sa Province of Cebu Tourism Office portal alang sa booking confirmation nga napili nga resort o cottage nga maoy ipakita sa checkpoint aron nga makalahos sa dapit nga inyong adtoan.

Mipasabot ang munisipyo bisan tuod nga hinayhinay nilang gibuksan ang turismo sa Moalboal apan gikinahanglan gihapon silang magmatngon sa kabalaka nga mokatap og balik ang coronavirus disease. Ang lungsod adunay upat ka active cases sa Covid-19.

Minilyon ga isda

Bisan sa kagamay sa maong lungsod nga adunay 15 ka barangay apan nahimong inila locally ug internationally ang Moalboal gumikan sa na-preserbar niini nga marine life.

Numero uno sa listahan nga dili angayang sipyaton kon anaa sa Moalboal mao ang pakiglangoy sa lapad ug baga nga gidaghanon sa mga sardine fish.

Gibana-bana nga 30 metros gikan sa baybayon sa Panagsama makita na pinaagi sa pagsakay og pumpboat ang nagtapok nga sardinas nga diin naila ang Moalboal sa “Sardine Run.”

Tibuok tuig anaa ra ang presensiya sa maong silver nga kolor sa isda nga mogilak sa ilang paglangoy nga usa ka phenomenon nga makapangangha sa divers o bisan niadtong mag-snorkeling.

Kadtong adunay mga underwater camera palihug ayawg kalimti sa pagdala aron inyong ma-document ang ilawom nga bahin sa dagat nga dili makita sa bisan asa nga dive spot gikan sa nagkadaiyang kolor ug porma sa corals ug sa laing matang sa isda nga magpamidpid sa reef wall.

Aduna say pipila ka pawikan nga masaag sa maong area apan daghan kini ngadto sa Tongo beach.

Kon maka-timing adunay presensiya sa thresher shark nga masigpatan tungod kay lakip sa ilang food chain ang sardinas.

Quo Vadis Dive Resort

Si Mayor Rozgoni, tag-iya sa Quo Vadis Dive Resort, nagkanayon nga buot niyang agnihon ang local tourists aron nga ilang ma-enjoy o masaksihan ang gasa sa kinaiyahan nga dia ra sa atong tugkaran.

Matod sa mayor nga sagad ilang guest o bisan sa ubang resorts mga langyaw naglakip sa Europeans, Americans, Australians ug adunay Asians sama sa Japanese nga mahilig og scuba diving.

Iyang gipahibawo nga rate niadtong buot mag-scuba dive sa Quo Vadis moabot sa P3,500 alang sa usa ka adlaw, apil na niini ang pagpa-ubos sa basic diving lesson, paggamit sa diving equipments, instructor, boat ug adunay i-isyu nga temporary sea card, apan mas bintaha kadtong aduna nay lisensiya na sa scuba diving.

“Kon diver ka ma-appreciate man gud nato nganong atong protektahan ang underwater. Lahi ra gyud nga surface lang ang makita,” dason ni Rozgoni, usa ka dive master.

Subli nga gipahibawo ni Rozgoni nga ilang gihingusgan ang pagpanalipod sa ilang kadagatan nga maoy nag-unang nga panginabuhi-an sa lungsod ang pagpangisda ug turismo.

Bisan ang mga kawani sa ilang Tourism office sagad mga diver aron mas masabtan nila ang kabililhon sa kinabuhi ilawom sa dagat.

Panghinaot sa mayor nga suportahan ang local tourist spot ilabi na nga nihit pa karon ang langyaw turista resulta sa pandemic, aron nga mabuhi pagbalik ang turismo sa Moalboal,

Apan gikinahanglan nga sabton ang new normal nga pamalaod nga ilang gipatuman aron malikay sa Covid-19.