Editoryal: Kahinay sa hustisya

Editoryal: Kahinay sa hustisya

NILANAT pa og kapin sa usa ka dekada una nasilutan ang mga opisyal nga nalambigit sa anomaluso ug eskandalusong pagpamalit sa street lamps nga gipangtaud sa mga sidewalk sa mga karsada nga giagian sa mga delegado sa tigom sa Association of Southeast Asian Nations (Asean) sa 2007.

Pagkabilanggo gikan sa unom ngadto sa walo ka mga tuig tungod sa graft and corruption ang silot nga gipahamtang sa Sandiganbayan batok sa tulo ka mga opisyal sa Department of Public Works and Highways (DPWH).

Nakaplagan sa mga ahensya sa kagamhanan nga nag-imbestigar nga gipaburot og labing minos P11 milyunes ang presyo sa mga decorative lamp post nga bisan usa wa ka nay makit-an diha sa karsada. Gibantayan unta kadto isip monumento sa pangurakot ug mahinumdom ang publiko giunsa og bulsa ang buhis nga gisingtan sa kadaghanang yanong mga tawo.

Nahatagan man tuod og hustisya ang pag-abuso sa pundo sa kagamhanan, apan nilanat pa og sobra sa usa ka dekada una nakab-ot ang hukom sa Sandiganbayan. Ingon niana kahinay ang paghusay sa mga kaso sa hukmanan hinungdan nga sa ubang mga dapit, wa nay kihaay, diretso na lang og pinatyanay.

Ang kahinay sa paghusay giingong produkto sa mga buslot sa balaud nga pahimudsan niadtong kwartahan ug gamhanan. Ang mga opisyal sa kagamhanan nga nag-atubang og mga kaso nigamit niini nga hinagiban pinaagi sa pagkuha og mga abogado nga de kalibre.

Nahibaw-an na ang kahuyang ug kahinay sa pagligid sa hustisya dinhi sa nasod, apan wa kini himoi og lakang aron makorihian. Unsaon man sab gud, ang mga makapahimus niini mao ra sab tong mga tawo nga naa sa gahom nga maoy nagpanday sa balaud.

Bitaw, sa kahinay sa hustisya, mamatay na lang ang akusado ug reklamante, naa pa sa korte ang kaso, wa pa mahukmi.

Related Stories

No stories found.
SunStar Publishing Inc.
www.sunstar.com.ph