BISAN tuod og sa 2022 pa ang national ug local elections ug dako ang posibilidad nga mawagtang na kining coronavirus disease (Covid 19) nianang tuiga, apan nahuna-hunaan sa pipila ka mga magbabalaud nga i-postpone ang eleksiyon, labi pa kon magpadayon kining hulga sa pandemya.
Si Pampanga Congressman Mikey Arroyo mao ang misugyot niini ug gisuportahan sa pipila ka mga kongresista. Ang Commission on Elections (Comelec) nagkanayon nga wala kini sa ilang gahum ug ang Kongreso lamang ang makahimo niini. Anaa sa atong 1987 Constitution (Section 4, Article 7) nga ipahigayon matag unom tuig alang sa pagpili og Presidente ug Bise Presidente. Matag tulo ka mga tuig usab alang sa 12 ka mga senador, kongresista ug local officials.
So, kon i-postpone, natural ma-extend ang term of office gikan sa Presidente, Bise Presidente ug ubang piniling mga opisyal. Wala kaha kini constitutional issue nga motumaw kay fix baya ang balaod sa pagpahigayon sa eleksiyon sa atong Batakang Balaod? Ato kanang ibilin ang maong isyo sa Kongreso ug ngadto sa Korte Supreme kon moabot man ang maong issue sa Labaw’ng Hukmanan.
Si Presidente Duterte mismo dakong supak sa maong plano. Dili gyud ikatingala nga daghan ang mo-react kon tandugon na ang balaang katungod sa katawhan sa pagbotar. Ka usa ra kada tulo ka tuig nga ang mga Pinoy makapakita sa iyang gahum sa pagbotar. Mao kanang adlawa ang atong gituhuan nga makapabati kita sa atong tingog sa pag-uyon o sa pagprotesta sa pamalakaw sa atong kagamhanan
Ug kon iuswag sa way katinuan kanus-a siya makabotar nahisama kana sa paghikaw kaniya pagpagawas sa iyang tingog. Diin dili na siya maka kuwestiyon ug dili na siya maka protesta. Ug ang kapakyas sa pagprotesta alang kaniya maoy usa ka matang sa pagtahan sa iyang katungod sa pagbotar.
(bobbygnalzaro@gmail.com)