NISAKA ngadto sa 30.7 porsiyento o mokabat sa 7.6 milyones ka mga pamilya sa Pilipinas ang nakasinati og involuntary hunger o way makaon sa labing menos usa ka higayon sa buwan sa Septiyembre, sumala sa survey sa Social Weather Stations (SWS).
Ang resulta sa survey nga gihimo sa Septiyembre 17 ngadto sa 20, mas taas kay sa 23.8 porsento nga natala sa Marso 2012. Sa ulahing survey, 22 porsiyento o 5.5 miyones ka mga banay ang nakasinati og moderate hunger ug 8.7 percent o 2.2 milyones ka pamilya ang nakasinati og severe hunger.
Ang moderate hunger mao kadtong nakasinati og gutom sa pipila ka mga higayon sa miaging tulo ka mga buwan, samtang ang severe hunger mao kadtong kanunay nga gigutom sa miaging tulo ka mga buwan.
Mahinumdom lang ta sa inahan nga niingon sa iyang anak, “Anak, hutda kanang pagkaon sa imong plato kay daghang mga bata nga gipanggutom ug way gikaon karon.” Apan ang anak igo lang niingon, “Unya og hutdon nako ni'g kaon, mabusog to sila.”
Wa siya masayod nga sa laing panimalay usa ka bata ang naghilak sa kagutom ug gihadlok na lang sa inahan kay way ikahatag nga pagkaon. Matod sa inahan, “Hilom anak kay naay wakwak.” Matod sa anak, “Asa man nang wakwak, Ma, kay akong kan-on?”
Di tiaw ang nasinati nga gutom sa minilyon sa atong mga kaigsuonang Pilipino taliwa sa Covid-19 pandemic. Tungod kini kay daghang mga kompaniya nga nanira, busa daghang nawad-an og trabaho. Way trabaho, way suweldo, way ikapalit og pagkaon.
Mao kini nga gusto sa Malacañang nga buksan pagbalik ang ekonomiya aron makabalik na ang kadaghanan sa ilang mga trabaho. Subo nga palandungon ang resulta sa survey sa SWS, matod pa ni Presidential Spokesperson Harry Roque.
Ang mga hinabang sa gobyerno, matod niya, temporaryo lang. Apan segurado nga mamenosan ang gidaghanon sa mga gipanggutom kon makabalik na ang kadaghanan sa ilang naandan nga panginabuhian, matod niya.
Sanglit wa pay bakuna batok sa Covid-19, angay tan-awon sa gobyerno kon unsay paagi nga makabalik ang kadaghanan sa ilang mga trabaho nga di sab sila mamiligro nga matakdan sa maong balatian.