Pagkapriso sulod sa unom ngadto sa walo ka tuig ang gipahamtang nga silot sa Sandiganbayan batok sa tulo ka mga kanhi opisyal sa Department of Public Works and Highways (DPWH-7) ug usa ka pribadong tawo. Ang kasong pagpangawkaw may labot sa kontrobersiyal nga lamp posts nga gipamutang sa mga sidewalk sa mga karsada sa mga Dakbayan sa Lapu-Lapu, Mandaue ug Sugbo nga giagian sa mga delegado sa 12th Association of Southeast Asian Nations (Asean) Summit sa 2007. Guilty sa korupsyon subay sa iregularidad sa pagpamalit sa decorative lamp posts sila si Robert Gingging Lala, Pureza Fernandez, Agustinito Hermoso, ug Gerardo Surla tungod sa paglapas sa Section 3 (e) sa Republic Act 3019 kun Anti-Graft and Corrupt Practices Act. Ang 81 ka panid sa desisyon nga gipirmahan ni Associate Justice Kevin Narce Vivero sa Septiyembre 24 nagsulti nga atol sa pagsusi, nahibaw-an nga nalakip sa korupsyon si Lala, kanhi regional director sa DPWH Region 7, Fernandez, kinsa officer-in-charge-chief sa Maintenance Division, samtang si Hermoso isip sakop sa Bids and Awards Committee (BAC). Sa laing criminal information nga gisang-at sa piskaliya, nasuta nga nagsabot ang upat sa pag-ila daan sa winning bidder sa gipamalit nga 120 ka sets sa suga pangdekorasyon sa Gampik Construction and Development Inc. Ang mga poste ug suga nikantidad og P35,634,401.25. Sa pagsubay wa, moagi og competitive bidding ang procurement. Subay sa computation sa Office of the Ombudsman Visayas nga base sa presyo sa merkado, mokantidad og P12.6 milyones ang pagpasobra sa presyo.