MORA kunog dunay posibilidad nga magka-uban sa usa ka proyekto (pelikula o teleserye) sila si Gladys Reyes, Claudine Barretto, Angelu de Leon ug Judy Ann Santos.
Kahinumdoman nga si Gladys ang naghimo sa kinabuhi sa mga karakter sa tulo nga miserable isip kontrabida.
Sa maong bag-ong proyekto, puparehas kuno sa “Desperate Housewives” ang istorya. Atong paabuton.
Samtang may mga managpares nga nipadayon sa ilang panumpa nga magpakasal bisan pa sa pandemic, si Jason Abalos ug Vickie Rushton wa palabot.
Ilang gi-uswag ang ilang natakda na untang pag-atubang sa altar sa kaminyoon tungod sa pangandoy ni Vickie nga mahimong beauty queen samtang dalaga pa kini.
Ning puntoha, nakadayeg ko ni Jason andam siyang nisakripisyo tungod ug alang sa pangandoy sa iyang minahal.
Haaay gugma!
Niadtong naghinapos ang Hulyo nag-post kog ‘inamaw’ piktyur nga naggunit og chopsticks nga may longganisa sa tumoy.
Wa damha nga daghan kaayong ni-react sa maong piktyur.
Sa paggawas sa memory sa Facebook nga nagpakita sa akong ‘most liked photo’ sa 2013 nga diha ko sa rostrum sa Kapitolyo kompleto sa official seal, mas daghan pa man ang ni-react.
Duna pa gani uban nikomento nga angayan kuno kong magpolitiko, mag-konsehal, mag-mayor, mag-board member, mag-gobernador. Haaa?
Haha! Hinayhinay lang! Kuyawg madagma ta.
Agig tubag sa maong mga komentaryo, akong gamiton ang kanhi sikat nga linya nga gipahinungod niadto sa AlDub sa init pa kaayo ang maong loveteam: ‘sa takdang panahon.’ Syobis gyud kaayo! Unsa man diay?
Samtang nagdagan ang East ug West Conferences sa NBA, dedma ra gyud ko hangtud nga hapit na magdaug ang duha ka conferences.
Ambot unsay nahitabo nga nikalit ra man pag tunga ang akong interes sa liga.
Kagahapon, usa ko sa minilyon nga nagpaabot sa unang sangka sa LA Lakers ug Miami Heat.
Kon asa ko nidapig? Miami Heat.
Tingali ang mas dakong hinungdan mao ang pagka Fil-Am ni Coach Eric Spoelstra labaw na sa kamaayo sa iyang mga players ning higayona, nigawas na sab ang akong pagka-’rebelde’ ug supakero nga di dali mosunod kon unsay uso, init o inilog.
Ayaw kog lalisa kay di gyud ta magdaug huwaton na lang nato ang resulta. Anà!