SA pag-igo sa pandemiya sa tibuok kalibutan, naundang ang tanang klase sa paugnat sa kusog lakip na ang boxing, usa sa labing gihangop nga paugnat sa kusog sa Pilipinas.
Ang Omega Pro Sports Omega Pro Sports International (OPSI) mobuhat og kasaysayan sa ilang boxing match nga giulohan og Kombati 5 nga mao ang labing unang pro boxing match sa Pilipinas sukad miigo ang makalilisang nga coronavirus 2019 (Covid-19).
Ang maong boxing event adunay upat ka mga away ug ipahighayon kini sa planta sa International Pharmaceuticals, Inc. (INC) sa dakbayan sa Mandaue karong Oktubre 7, 2020.
Wala’y tugtan nga mga tumatan-aw, hinuon ipakita kini live sa Facebook page.
Si Mark Vicelles (11-0-1, 5KOs) sa Omega Boxing stable moaway sa main event atok sa pambato sa General Santos City nga si Junuel Lucar (8-5-3, 6KOs) sa 10-rounder 108lbs. nga sangka.
Matod ni Omega boxing stable head coach si Julius Irving Junco nga andam na iyang mga batos alang ning maong promosyon.
Iyang gipasabot nga dugay na nga nagpraktis ang ilang mga boksidor kay stay-in man kini sila sa ilang boxing gym.
Hinaot ni Junco nga makita sa mga boxing promoter ang kaandam sa iyang mga batos bisan paman panahon sa pandemiya.
“I’m calling out international promoters if you want quality boxers we have a lot here in Omega who are willing to fight even on a short notice. We stay ready all the time, mao gyud na pirme amoa diri once boxer sa Omega bisan walay schedule,” matod pa ni Junco.
Sa laing away mopakita og aksyon ang sparring partner ni three-division world champion Naoya Inoue nga si Pete Apolinar (11-1, 8 KOs) batok kang Jetro Pabustan sa co-main event.
Si International Boxing Federation No. 9 rated light flyweight Christian “The Bomb” Araneta (17-1-0) moaway batok ni Richard Rosales samtang si Carlo Baro makigharong kang Jeffrey Stella.
“Sa tibuok Pilipinas I’m proud to say akong boxers guro pinaka-condition kay naka-bubble na man ni sila since January,” saysay ni Junco.
Pahimangno ni Junco sa mga boksidor nga magpadayon lang sa ilang training aron mobaid ang ilang abilidad ug techniques samtang maghuwat sa ilang mga away.
Dugang niya nga alkanse ang boksidor kon mohunong kini sa training.
Ang tanang out-of-town boxers kay naabot na niadtong Miyerkules, Septiyembre 30, 2020 ug gipaubos sa Covid-19 test kauban sa coaches, referees ug ubang staff nga nahilambigit sa promosyon.