NAGMONITOR ang National Basketball Association (NBA) sa Philippine Basketball Association (PBA) kabahin sa pagbalik sa aksyon sa labing unang professional nga liga sa Asya pinasubay sa ‘bubble’ nga konsepto.
Ang NBA maoy unang migamit sa ‘bubble’ nga konsepto ug ilang gipaambit ang tanan nilang mga regulasyon ug pamaagi ngadto sa PBA.
Si Scott Levy, managing director sa NBA Asia, nibutyag nga naghinamhinam na sila sa PBA bubble nga sugdan karong Oktubre 11, 2020 sa Clark, Pampanga.
“(We are) very much aware and very well-connected to the PBA. We have shared our protocols with them already,” asoy ni Levy nga napatik sa pba.ph.
“We’ve shared them with the PBA, and we are staying connected, and available for any questions that they may have. We are rooting for them to be successful, and very excited that the PBA will be starting up again soon.”
Sama sa NBA, nahunong ang operasyon sa PBA niadtong Marso, 2020 gumikan sa pagkuyanap sa coronavirus disease 2019 (Covid-19).
Ang NBA nakabalik na niadtong Hulyo, 2020 apan nalangan ang pagbalik sa PBA gumikan sa estriktong quarantine restrictions sa Philippines.
Nadasig ang PBA sa kalampusan sa bubble nga konsepto sa NBA hinungdan nga nihangyo kini nga mosunod ning maong lakang.
Daghang mga opsyon ang gikonsiderar sa PBA kabahin sa ilang pagbalik apan ang konsepto sa bubble maoy nakapatando sa PBA board human sa taas nga diskusyon.
Ang PBA mipahimangno sa tanan nilang mga magduduwa nga bug-at nga silot ang ilang ipahamtang sa mga makasupak sa health protocols nga ilang ipatuman sulod sa bubble. (ESL)