MAAYONG adlaw mga ka-SuperB! Did you miss me? I miss you very much!
Dili lalim ang atong mga ginaagian nga mga kabag-ohan, right? Awww... dili god tanan lisod apan makakurat usahay. Samtang buhi pa, magpadayong magmapasalamaton kita, higala.
Ang kinabuhi (lisod o hayahay), gasa sa Ginoo busa inay magbagutbot o magbangutan, ato kining taga'ag importansya tungod basig kutob na lamang kini karong adlawa.
So, tell me... sa unsang pamaagi mo nagalahutay kay basi diay mamahimo natong awaton aron kitang tanan magmalahutayon. Tungod dili ko tiggawas sa balay kaayo bisan wala pa ang Covid-19; wala kaayoy dakong kabag-ohan apan sama sa kadaghanan karon, mibati ug padayong nagabati og pagkalaay ug pagpangaluya panagsa.
Dako kaayong tabang ang online (kanang sa internet) nga mga pagsimba tungod makagaan sa dughan ang pagtuon sa balaang pulong sa Kahitas-an. Sa pagsimba anaa pod ang tyansa nga makahigayon kitag pag-ampo alang sa atong mga kaugalingon ug pamilya... apil na usab ang mga lider sa atong nasud ug ang mga ginaagian sa matag-tawo sa kalibotan. Yes, oportunidad nga makahiusa kita sa ispiritwal nga kalihokan bisan anaa ra kita sulod sa atong mga lawak mga kahigalaan.
Sa kadaghang palpak ug kalisod sa mga kalihokan sa gobyerno ug ubang ahensya nga pribado, "prayer" ug dili sige'g reklamo kay adunay kahimoan kini kung isurender nato sa trono sa Ginoo. Walay imposible sa Diyos. Dili mubo ang kamot sa Diyos aron hikapon ang matag-kinabuhi nato. Dili siya bungol nga dili kadungog sa atong mga mulo. Labaw nga dili buta ang Diyos sa atong mga ginaagian, busa sa pag-ampo 'dili' kita moundang, AMEN?
Bitaw, sa paglingaw sa kaugalingon, ang paggamit sa internet application sama sa Facebook, messenger, Netflix ug YouTube nakatabang nako. Naa pod ang pagpananum og cactus ug gulay kung nindot ang panahon, apan mas nakalingawan gayod nako ang pagluto-luto ug pagkaon busa bus-ok dili lang akong pus-on apan apil na ang akong nawong ha ha ha.
Bitaw, simpleng pagkaon makalipay naman nako. Mas nalipay pa gani ko sa dihang gihatagan ko og kaldereta, paklay ug kilawin kambing ni Manang Alona. Morag way bout pero happy kaayo ko sa akong nahabhab.
Karong panahona, dili na kita "choosy" sa mga butang nga makapalipay sa atoa. Daghang nagbangutan busa panalangin kung bisan sa simpleng matang, mogaan ang imong dughan.
Nagabawi pod kog ehersisyo inig sobra duha ka hukaran na ang mahabhab nako. Pwede ra mag-bike o baktas palibot sa balay sulod sa 30-minutos. Makahilis na kini sa atong kinaon; makahatag pa kinig kemikal sa atong utok (dopamine ug uban pa) nga natural makapalipay sa pagbati ta. Chill lang ha, mwaaahhh!