DIGOS CITY -- Misipa na sa 82 ang kompirmadong kaso sa Covid-19 dinhi sa dakbayan human nadugang ang 32 anyos nga babaye gikan sa Scout Borromeo, South Triangle, Quezon City.
Lumad sa siyudad ang pasyente apan didto na sa Luzon nanimuyo sukad niadtong Enero 2018 gumikan kay nagtrabaho kini sa usa ka television network.
Niadtong bulan sa Septyembre, nakahukom kini nga mopauli na dinhi sa siyudad hinungdan nga gi-proseso niini ang mga travel documents niadtong Septyembre 16 ug nianang Septyembre 28 sa ning tuiga nakasakay na kini sa abyon pauli.
Sa pagtugpa pa lang sa Davao International Airport, nipailawom dayon kini sa swab test una nakauli sa dakbayan, diretso sa Central Isolation Unit.
Gibutyag sa City Health Office (CHO) nga positibo ang resulta sa pagsusi sa pasyente apan asymptomatic kini ug padayong gi-obserbahan.
Sa pikas bahin, mokabat sa 67 ka indibiduwal ang gipailawom sa lokal nga gobyerno sa pagbansay niadtong Huwebes aron mahimong contact tracing team.
Sa maong adlaw, nagpatawag sab si Mayor Josef Cagas og emergency meeting sa Covid-19 Task Force sa siyudad.
Gituki sa tigum ang mga lakang nga pagabuhaton alang sa pagsumpo sa pandemya aron di na motaas ang ihap sa mga natakbuyan.
Giawhag sab ni Cagas ang publiko nga dili magpabadlong ug motuman sa minimum health protocols alang sa kaayohan sa tanan. (Orlando B. Dinoy)