PATAY ang usa sa duha ka mga suspek nga nagpusil sa usa ka barangay kapitan sa Guindulungan, Maguindanao Province, alas 4:05 sa hapon niadtong Martes, Hulyo 29, 2020.
Ang kapitan mao si Durex Kasim sa Barangay Muslim, Guindulungan, Maguindanao Province.
Gibutyag ni Guindulungan Chief of Police Major Maximino Gerodias nagpa-carwash si Kasim sa Barangay Tambunan 2 sa nahisgutang lungsod apan kalit lang miabot ang duha ka mga wala mailhing mga lalaki nga sakay og motorsiklo ug way daghang istorya gipusil ang kapitan.
Apan maayo na lang nga abtik nga nakalihay si Kasim ug igo lang natapsingan hinungdan nga nakabawos siya ngadto sa mga suspek nga padulong na moikyas.
Igo sa ulo ang usa sa mga suspek nga maoy angkas ug namusil sa kapitan hinungdan nga natumba ang motorsiklo samtang nakaipsot ang drayber.
Daling gisapupo si Kasim ug gihatud ngadto sa balay tambalanan ug maayo na ang kahimtang.
Kahinumdoman nga niadtong miaging adlaw, napatay sa pagpangambus si Guindulungan Municipal Councilor Morsid Midtimbang Lauban ug naangol ang lain pang duha ka kauban niini.