KIDAPAWAN CITY -- Misurender sa 108th Base Command sa Moro Islamic Liberation Front (MILF) alas 2:00 sa hapon, Huwebes, Oktubre 1, ang tulo ka suspek sa pagpusil-patay sa magsuong frontliners sa Pikit, North Cotabato.
Giila ang mga suspek nga sila Sardin Mudali, Aladin Ali Bayah ug Gapor Balabagan Datungan.
Sumala kang Pikit Chief of Police Captain Mautin Pangandigan nga misurender ang mga suspek kang Kumander Hadji Bayan sa 108th BC sa MILF.
Gimando mismo ni Kumander Bayan nga dakpon ang mga suspek ug kung mosukol, patyon ug nahadlok, hinungdan nga misurender ang mga nahisgutan.
Mga nahisgutan naa sa kustodiya ni Kumander Bayan ug gihuwat na lang ang mando gikan sa Bangsamoro Islamic Armed Forces (BIAF) sa MILF aron itunol sila ngadto sa kapulisan.
Kahinumdoman nga nakig-transaksiyon ang mga suspek pinaagi sa social media ngadto sa magsuong sila Haizon Wahab, kinsa barangay kagawad, ug Bai Puti "Pepcy" Wahab nga nurse ug pulos frontliners ug nagpuyo sa Barangay Dalican,
Datu Odin Sinsuat, Maguindanao Province.
Sa dihang nagkita na ang mga biktima ngadto sa mga suspek aron mopalit og motorsiklo, gitulis ug gipatay sila sa mga nahisgutan didto sa Sitio Pogpog, Barangay Inug-ug sa Pikit.
Giplastar na sa pamilya sa mga biktima ang pagpasaka og kaso, inabagan sa kapulisan sa Pikit Municipal Police Station.