Albor: Nangiwit sa edukasyon

Sa kalibotanong sistema sa edukasyon labing iwit ang Pilipinas. Namatud-an sa worldwide study nga nagsukod sa kaalam sa mga tinun-an sa reading mathematics ug science. Sa 79 ka mga nasod nga misalmot sa 2018 Programme for International Students Assessment (Pisa) nangiwit ang Pilipinas sa resulta nga gipagawas sa Disyembre 3, 2019. Ang Pisa gipasiugdahan sa Organization for Economic Cooperation and Development (OECD).

Gisalmotan ang maong pasulit sa 600,000 ka mga estudyante sa tibuok kalibotan nga nag-edad og 15 anyos. Pilipinhong mga tinun-an nakakuha lamang og 340 puntos sa 487 puntos nga gisitar sa OECD. Iwit sa reading comprehension ug ikaduhang iwit sa mathematics ug science.

Ang mga siyudad sa Beijing, Shanghai, Jiangse ug Zeijang sa China mao ang nag-una samtang ikaduha ang Singapore. Wala makatabang ang dugang duha ka tuig nga K-12 panahon ni Pres. Noynoy Aquino human mamatikdi nga nagkagidlay ang batakang edukasyon.

Sa sayo pa gisaway sa Department of Education (DepEd) ang K-12 kay dili pa andam. Miangal sab ang mga ginikanan kay nagdugang og palas-onon taliwala sa nagping-it nga kahimtang.

Gusto man god natong makig-indig sa mga nasod sa Holland, Germany, Georgia ug ubang European countries nga isip first world nga kanasoran dako ang gahin sa ilang edukasyon, insakto ang suweldo sa mga magtutudlo, kompleto sa mga libro, classrooms ug buhong sa school facilities.

Ang Pilipinas nahimotang sa third world countries nga daghan og kakulangan sa nataran sa edukasyon ug sayop nga sistema nga nasuta sa resulta sa PISA. Nakatampo ang kakabos, daghang homework, naghinobra ang aktibidades ug ang mga modernong teknolohiya nga nakasimang sa pagtuon sa kabataan.

Makab-ot lamang ang himsog, kalidad, kaangayan, bili ug gibug-aton sa edukasyon kon dugangan ang mga magtutudlo, dugang suhol, classrooms, school buildings, mga libro, school facilities, tun-an pag-ayo ang school curriculum ug ipatuman ang food for school program. Kon gahinan og igong pundo sa gobyerno dili na tingali kinahanglan ang dugang duha ka tuig sa batakang edukasyon (K-12).

Kahinumdoman, ang atong katigulangan haniti nga mokwenta ug molitok og iningles bisan kutob ra sa Grade II, Grade III ug Grade IV. Dili ba Sir ug Maam? Dili ba kaha makaapekto sa kalidad sa edukasyon ang distance/blended learning pinaagi sa modules, online internet, radio ug telebisyon? Ang edukasyon maoy bahandi nga dili makawat, dili ikabalhin, makaluwas sa kalisod ug makasukol sa mga hagit. Kon ang gobyerno makaalsa sa mga kabos sayon nga makab-ot ang edukasyon. (csa_1156@yahoo.com / 09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph