Ubay-ubay na sa akong kailang expats kon expatriate (mga langyaw nga wa na magpuyo sa ilang nasud-natawhan) ang mibalhin og puyo diri sa ato.
Ngano? Kay ang atong madanihong nasud ug kita mismong mga Pinoy daghan og mga hiyas nga di makita sa ubang mga langyaw.
Ikumparar sa ubang nasud, kitang mga Pinoy lihiro mo iningles, diba? Bisag wa pa kata-ak og high school kumbati na mo kukabildo og dayon ingon “Hi Joe!”
Gawas ini, duna sab tay subra 7 mil ka mga isla nga kapilian kung asa gusto ug komportable nga mo puyo, ma lungsod, bukid, o daplin sa baybayon.
Kung mahilig sa tubig, duna tay Palawan, Boracay o Cebu nga kapilian. Niadtong gusto og street food o night life, naa tay mga siyudad sama sa Cebu, Ilo-Ilo, Davao, Quezon o Dumaguete nga di pa tantong traffic ug polluted.
Kadtong gusto sab og mabugnaw’ng dapit o hilig mag-hiking o camping, mahimo sang mosaka sa Baguio o Tagaytay Cities.
Gawas sa mga madanihong mga lugar ug talan-awon, kita mismo maoy numero unong rason nganong ganahan sila mo balhin kay sugaton man dayon sa mainitong pag-abi-abi ug tam-is nga pahiyom ang mga bisita.
Bisan pa man sa kalisod, kitang mga Pinoy positibo gihapon og panglantaw sa kinabuhi og kanunay nagpasalamat sa mga grasyang nadawat imbis mo reklamo sa kalisod.
Laing giganahan sa mga expats mao ang balor sa pagpuyo kon cost of living kay barato ra sab. Ang ilang $1 makapalit na og usa ka kilong bugas. Kung ari sila mopuyo, mabuhi na sila og komportabli sa ilang $800-$1,200 nga pension dala na ini ilang medical insurance, suroy-suroy og kalingawan.
Barato sab ang bayad sa serbisyo ug medical services maong sayon ra i-hire og kusinera, hardenero o caregiver kaysa ilang nursing homes.
Ang abangan sab sa mga dakong balay o apartment nga fully furnished mas barato ($350-$400) itandi sa ila. Kini nga kantidad puparehas ra og nangabang sila og gamay nga lawak sa ilang nasod.
Daghan sab ta og kasilinganang nasud nga ilang kasuruyan sama sa Thailand, Vietnam o South Korea.