Curfew hour sa Mandaue gipamub-an

GIPAMUB-AN na sa Dakbayan sa Mandaue ang ilang curfew hours sugod sa Huwebes, Oktubre 1, 2020.

Kini nalatid sa gipagawas ni Mandaue City Mayor Jonas Cortes nga executive order alang sa bag-ong mga palisiya samtang ang dakbayan naa sa modified general community quarantine (MGCQ) hangtod sa Oktubre 31.

Ang bag-o nga oras sa curfew magsugod na sa alas 11 sa gabii hangtod alas 4 sa kaadlawn, diin sa una magsugod sa alas 10 sa gabii ngadto sa alas 5 sa buntag.

Giklaro sab sa EO nga ang exempted lang sa curfew mao kadtong authorized persons outside the residence (APOR), mga nagtrabaho sa business process outsourcing (BPO), mga industriya nga gitugotan mag abli sa oras sa curfew sama sa mga food o retail nga tindahan, delivery services, health workers, frontliners ug emergency workers.

Gawas sa curfew, nitugot na ang gobyerno sa dakbayan sa Mandaue sa mga restaurant o food establishment nga mobaligya o mohatag og mga ilimnong makahubog nga adunay business permit sa susamang negosyo.

Apan, kinahanglan pa gihapon nga mokuha og license to sell liquor ug license to serve liquor ang mga establisemento gikan sa Business Permit and Licensing Office (BPLO).

Sa mga mokuha, mobisita lang sila niining maong link aron mu-apply /bit.ly/3l3nNgp ug i-send ra sa BPLO pinaagi sa email ang mga lisensya.

Ang mga kustomer sab mamahimo lang mabaligyaan og di molapas sa duha ka indibidwal nga serving sa bisan unsang mga ilimnong makahubog.

Apan ang EO nidili gihapon sa pag-inom sa mga makahubog ngadto sa mga hawan nga pampublikong lugar, lakip ang mga sari-sari store ug convenience store.

Dugang niini, gidili gihapon sa pag-abli ang mga beerhouse, nightclub ug uban pang mga susamang establisemento nga anaa sa negative list. Ang mga makalapas sa mga sumbanan sa dakbayan mamahimong makanselar ang mga lisensya lakip na ang business permit.

TRUCK BAN

Gibalik na sab sa dakbayan sa Mandaue ang ilang truck ban policy, gikan sa alas 6 sa buntag hangtod sa alas 8 sa buntag ug alas 5 sa hapon hangtod sa alas 7 sa gabii. Kini epektibo matag adlaw, walay labot ang Dominggo ug mga holiday.

Gilibkas ang truck ban niadtong Abril human gipaubos sa enhanced community quarantine (ECQ) ang dakbayan aron mas paspas nga pag-transport sa essential goods.

Apan sa text message ni Arnold Malig-on, operations head sa Traffic Enforcement Agency of Mandaue (TEAM), siya niingon nga sugdan nila sa pagpatuman ang truck ban sugod sunod semana.