DAKONG pangutana karon sa mga sabungero kon legal ba kining online sabong. Di man gud sila mahimong manari karon kay dakpon. Apan kining online sabong kay duna man gyuy gi-video nga nagsabong ug pusta-anay pa gyud.
Nganong gitugtan man kuno kini? Unsang balaura ang nagtugot?
Maayo tingale nga mao kini ang tubagon nilang Kong. Sonny Lagon ug Games and Amusement Board (GAB) chairman Baham Mitra.
Gawas nga gitugtang mag-sabong ang gi-video sa online sabong, exempted sab kini sa sugal sama sa Philippine Offshore Gaming Operators (Pogo)?
Sa akong nasabtan, mga foreigners lang ang mahimong mosugal sa mga Pogo. Hinuon, daghan ang mga binuang diha. Pero, samot unta nga way sugal karon alang sa mga Pilipino. Di ba mao man kini ang lagda sa IATF?
Akong nadunggan nga gitugtan lagi kuno ang online sabong kay dili makatakod og Covid-19. So okay lang kining sugal alang sa mga adunahan. Tingale, kining pagdakop sa mga mokawatkawat og tigbakay gituyo aron manan-aw ang mga tawo online.
Ambot lang. Manghinaot kita nga klarohon kining maong isyu nilang Lagon ug Mitra.
Kini ra bang Lagon kay nangambisyon nga mahimong kongresista sa 6th district. Unya daghan kaayo ang mga sabongero sa Consolacion ug Cordova.
ALAN-LORD
Akong nasabtan nga dili lang tungod sa 2021 budget kining bugno nilang Speaker Alan Peter Cayetano ug Kong. Lord Allan Velasco.
Gikinahanglan man gud sa kampo ni Cayetano ang dakong pahat sa mga proyekto kay naa kiniy plano modagan alang sa pagka bise o pagka presidente mismo karong 2022.
Murag nakita nila nga panahon na karon nga mobiya kang Presidente Rodrigo Duterte ug di sila mosuporta sa iyang anak nga si Mayor Inday Sara sa Syudad sa Davao.
Si Lord Velasco nailhan nga loyalist ni Inday Sara. Ug kinahanglan nga makontrolar ang maghimo sa budget aron makatabang kini sa iyang kampo padung sa 2022. Nakahibawo na man kita nga modagan siya pagka presidente.
Tan-awn nato kon magpabilin ba ang gahum ni Inday Sara nga mopabalitok og mga kongresista sama kaniadtong iyang gipatangtang si kanhi Speaker Bebot Alvarez ug giilisdan ni Speaker Gloria Macapagal-Arroyo.
Sa pagkakaron lang, daw ang kampo ni Arroyo anaa kang Cayetano. Ang lig-ong tigsuporta niya mao si Kong. Mike Defensor, usa ka loyalist ni GMA. Kuyog sa kampo ni Arroyo mao sab ang kampo sa mga Marcos. Laing tigsuporta ni Cayetano mao baya si Kong. Martin Romualdez.
Mao kini nga makaingon ko nga atangan nato ang komprontasi karong Oktubre 14. (anol_cebu sa Twitter)