ANDAM na ang Department of Education (DepEd) Mandaue-Division nga mobali sa klase karong Oktubre 5, 2020.
Gani, nahatag na nila ngadto sa mga ginikanan sa mga estudyante ang mga modules sukad niadtong Oktubre 1, 2020 hangtod sa Oktubre 2, 2020.
Sa duha ka adlaw nga pagpanghatag sa module, way nasugatan nga problema ang mga maestra ug ginikanan, matod ni Dr. Estela Susvilia, assistant schools division superintendent.
Kini tungod ang kay ilang learning continuity plan niadto pang Mayo 2020 nila naplanohan ug nagpahigayon na sab sila og dry run sa pagpang-apod apod sa milabay nga duha ka mga semana.
Nasunod ang health protocol sa pagpang-apod apod sa modules pinaagi sa tabang sa mga opisyal sa barangay nga nialagad ug niabag sa mga maestra sa pag-apod apod.
Matod ni Susvilia nga nitaas ang nagpa-enroll sa pampublikong eskwelahan human nga adunay mga pribado nga tunghaan nga nihatg og suwat nga sila manira una karong tuiga.
Apan wa maghatag og gidaghanon kon pila ang mga pribado nga eskwelahan nga mnira ug pila ka mga estudyante ang ningbalhin sa mga pampublikong eskwelahan.
Isip abag sa mga maestra, sigon ni Susvilia nga mohatag sila og load allowance ngadto sa mga maestra aron ilang magamit sa pag-contact sa mga ginikanan ug estudyante kon magsugod na ang klase.
Bisan kon sagad sa mga estudyante nag-module, ang mga maestra on-call gihapon alang sa mga pangutana sa mga ginikanan ug paghatag og dugang instruksyon sa mga estudyante gikan sa alas 8 sa buntag ngadto sa alas 5 sa hapon.
VIDEO PRODUCTION
Sa laing bahin, ang DepEd Mandaue mipahigayon og video shoot alang sa television-based ug radio-based nga mga pagtudlo alang sa mga estudyante.
Nakig-alayon ang DepEd Mandaue ngadto sa SkyCable ug sa dyHP diin mohatg sila og airtime diin ipagawas ang mga gi-shoot sa mga maestra.
Matod ni Mercedita Demoral, education supervisor sa DepEd-Mandaue, nga sila ang na-assign sa paghimo og content alang sa kindergarten, mga subject sa Grade 3 sama sa English, Filipino, Arts ug Mother-Tongue Based Multilingual Education.
Tungod kay aduna sab silay usa ka maestra nga si Charlene Likaylikay nga nakapasar ug usa na sa national teacher broadcaster, mag-shoot sab ang DepEd Mandaue, diin si Likaylikay ang host.
Kini makita na sa national TV sa IBC channel 13 sa DepEd TV.
Bisan kon first-timer sa produksyon, ang mga meastra sa lainlaing eskwelahan sa DepEd Mandaue nagtinabangay sa pag edit, pag-shoot, pag-direct, paghimo sa infographics ug pagbutang og sound effects.