SUPERBALITA CEBU

PB mosusi kon mga tricycle makabiyahe na ba sa highway

ARON mahatagan og katin-awan ang mga traysikol ug pedicab driver sa lalawigan sa Sugbo, gidapit sa Hunta Probinsyal sila si Land Transportation Office (LTO) 7 Director Victor Caindec, Land Transportation Franchising and Regulatory Board (LTFRB) 7 Director Eduardo Montealto ug Department of the Interior and Local Government (DILG) 7 Director Leocadio Trovela sa Lunes, Oktubre 5 atol sa sesyon niini.

Kini aron mangayo og katin-awan kon makabiyahe na ba o dili ang mga traysikol ug pedicab sa nasudnong highway sa kalungsoran ug mga syudad sa probinsya sa Sugbo.

Kini human dunay gipalabang nga mga ordinansa ang usa ka lungsod ug siyudad, diin nalakip sa rota ang mga national highway.

Sa mosyon ni Bokal Red Duterte, chairperson sa committee on public services sa Hunta Probinsyal nga giuyonan sa mga kauban, duha ka mga ordinansa sa lungsod sa Barili ug dakbayan sa Toledo ang gi pugngan una tungod sa pagkasumpaki sa lagda sa naasoyng mga buhatan.

Kini mao ang ordinance No. 06-2020 sa Barili nga nagtugot sa mga traysikol, pedicabs ug motorized pedicabs nga maka operate sa national highway ubos sa hurisdiksyon sa lungsod. Samtang ang ordinance 2020-010 sa syudad sa Toledo nag regulate sa rota sa mga traysikol subay sa memorandum circular No. 2020-036 sa DILG.

Sumala ni Bokal John Ismael Borgonia nga isip lagda, gidili ang pagbiyahe sa mga traysikol ug pedicabs sa national highway.

Subay sa DILG memo 2020-036 nga gi isyu niadtong Pebrero 17, di tugotan nga maka operate ang mga traysikol sa national highways tungod sa rason sa kaluwaan sa mga driver ug mga pasahero.

Daghan nang mga aksidente nga nalambigitan sa mga traysikol nga hinay ang dagan samtang nagsubay sa mga karsada.

Apan sa samang memo, mahimo nga makahatag og exeption ang Sangguniang Bayan o Sangguniang Panglungsod kon wa nay alternatibo nga rota.

Dugang ni Borgonia nga isip local government units (LGU), angay nga mosubay sa lagda sa nasudnong ahensya sa gobyerno tungod kay may mga rason sab aron alang sa kaluwan sa mga traysikol sa pagsubay sa nasudnong mga dan.

Gipugngan una ni Duterte ang mga committee report nga nagtugot sa duha ka mga ordinansa sa Barili ug Toledo.

Gustong klaruhon una nila aron way mapara nga driver sa mga awtoridad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph