Ubos sa katunga ra sa PUJ makabalik

File photo
File photo

MAKABALIK pa ang tradisyonal nga mga jeepney sa kadalanan sa Dakbayan sa Sugbo, apan dili tanan.

Wa kaabot sa tunga sa orihinal nga gidaghanon sa public utility jeepney (PUJ) units sa dakbayan ang mamahimo nga mobalik pagbiyahe sa mga karsada sa dakbayan.

Sa wala pa ang coronavirus disease (Covid-19) nga pandemya, adunay 5,044 ka mga jeep ang nagbiyahian sa dakbayan.

Apan matod ni Cebu City Councilor James Anthony Cuenco, chairperson sa task force, anaa lang sa di mumenos 1,000 ka PUJs ang mamahimo nga makabalik.

Pero gisiguro ni Cuenco nga makabalik ang mga tradisyonal nga jeep, base nasad sa consensus sa task force.

“Among the members of the task force, we came up with a consensus nga pabalikon gyud ang mga traditional jeepneys,” matod ni Cuenco.

Si Mayor Edgardo Labella niumol sa task force aron maoy magtuon unsaon pagbalik sa mga tradisyonal nga jeep.

MIALMA

Human masayod sa desisyon, mialma ang PUJ nga sektor.

Si Greg Perez, presidente sa Pinagkaisang Samahan ng mga Tsuper at Operator Nationwide (Piston) Cebu, sa interbyu niadtong Sabado, Oktubre 3, 2020, nikwestyon niini.

Siya nangutana unsa’y mahitabo sa mga driver nga nagsalig lang sa pagpamasahero.

“Mao na amo nakita nga problema man, unsay mahitabo sa mga driver ug mga pamilya niini nga wala man gyod sila lain nga income,” matod ni Perez.

Gipangutana sad niya unsa’y plano sa gobiyerno alang sa mga drivers nga di makabalik sa pagpamasahero.

Niadtong Marso, pagsugod og pagpatuman sa health protocol sama sa social distancing sud sa sakyanan, ang tradisyonal nga jeep ang labing una nga nakasinati sa impact sa pandemya tungod sa limitado lang nga pasahero ang makasakay.

ALTERNATIBO

Giawhag ni Cuenco ang mga drivers nga mo-apply sa jeepney modernization program ug sa ubang mga programa sa Land Transportation Franchising and Regulatory Board (LTFRB).

“Amoang gi-encourage is to avail themselves on the loan para sa modernized jeepney,” matod ni Cuenco.

Matod ni Cuenco nga nipahibawo si LTFRB 7 director Eduardo Montealto nga adunay mga skills training nga gipahigayon ang maong ahensya sama sa welding.

Apan si Perez miingon nga di sila mohunong og hangyo sa gobyerno hangtod makabalik sila kay uban nila wala’y laing padulngan.

“Padayon sa gihapon among panawagan sa balik pasada ug pangayo og ayuda sa gobyerno kay wala man lain kadaganan ani,” matod ni Perez.

Matod ni Cuenco nga gipaspasan sa task force ang tahas nga gihatag kanila para aduna na unya dayon maimplementar nga aksyon ang City Hall.

Sa Oktubre 5, makigkita si Cuenco sa mga driver, operators ug uban pang stakeholders sama sa riding public para matuki ang mga kondisyon sa LTFRB ug para sad mapaminaw ang habig sa mga PUJ driver ug operators.

Sunod sa LTFRB guidelines, ang mga unit lang nga makapasar sa road worthiness standard ang mamahimong makabalik, matod ni Cuenco.

Siya niingon nga tan-awon usa ang performance sa mga drayber kon mosunod ba sa mga traffic rule.

Ang mga health protocol kay hugot sab nya nga ipatuman.

“But we will be very stringent this time kay of course, daghan og conditions gipang-point out ang LTFRB before they can resume,” sigun ni Cuenco. Aduna sa’y gisugyot nga bag-ong mga rota ang City Planning and Development Office para sa mga lugar nga wa pa’y moagi nga public utility vehicle.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph