NAPUTOS sa kaulawan ang atong ubos balay balaoranan niining katungaan sa termino sa pagka-Speaker sa 18th Congress, sukad sa akong na-obserbahan sa daghan nang mga presidente ang milabay, karon lang nahitabo nga sa unom ka tuig nga termino sa pangulo, upat ka speaker ang nagpuli-puli sa atong kamara baha.
Dili unta kini mahitabo kon tarong pa ang unang speaker nga gipili sa atong presidente, unsaon man, nga sobra man ka diktador kon dili ka musanib sa ilang partido, wala ka’y budget ug alegasyong gihimong tinubdan sa pagpanguwarta nga murag natubigang palaka.
Atong balikan si Alan Peter Cayetano ug si Marinduque Rep. Lord Allan Velasco, human matapus ang termino ni Gloria Macapagal-Arroyo, gipatawag silang duha sa atong presidente didto sa Malakanyang ug nagkasabot sa term sharing.
Ang kasubutan unang molingkod si Cayetano sulod sa 15 ka bulan, ug pormal kining milingkod niadtong Hulyo 22, 2019, ug si Velasco maoy motiwas sa 22 ka bulan hangtud matapos ang termino sa atong presidente sa Hunyo 30, 2022.
Ang maong kasabutan, ilang gipermahan atubangan mismo ni President Rodrigo Duterte ug natural, dili mawala si senador Christopher Go, ug karon maoy giwara-wara ni Rep. Velasco sa tumong nga iyang konsensiyahon si Cayetano.
Si Cayetano nga gilami-an sa iyang posisyon, gipahimuslan ang kahigayonan tungod kay daghan siya’g numero o kaalyado bisag wa pa moabot ang gitagal nga petsa sa pag-turnover, nag-resign kunohay aron pugngan sa iyang mga alipores, ug wala dawata ang iyang resignation sa mayorya.
Gipasi-atab ni Cayetano nga kuno mihangyo ang atong presidente kang Velasco nga i-sibog daw ngadto sa Disyembre ang turnover gumikan sa General Appropriations Act sa 2021 budget; sumala pa ni Cayetano wala kuno mosugot si Velasco, ug sumala pa sa naulahi, gi-hostage ni Cayetano ang 2021 National budget nga matapus man unta kini hangtud sa Oktubre 12 ngadto sa petsa 14.
Sa inyong patas nga pagtimbang-timbang, kinsa ang angay paboran ug irespito niining isyuha? Insakto ba si Velasco sa pag-ingon nga “Walay Palabra de Honor si Cayetano”? Para sa ako, dunay punto si Velasco.
Kay kung motuman gyud siya sa pormal nga gipermahan nga kasabutan, iyang tambagan ang iyang mga kaalyado aron dili ta magkawatak-watak, maghiusa ta, atong suportahan ang mosunod nga bag-ong speaker kay mao kini ang kasabutan ug kitang tanan, usa ra, puro kaalyado sa atong presidente.
Atong na-obserbahan nga si Cayetano daw di mutoman og kasabutan, gamiton ang majority para magpabilin siya nga speaker.
Alang nako, ang maong hitabo, nagpakita lang nga puro mga personal, padagkuay sa ilang pahak sa budget kay kon malakas ka sa speaker, dagko ka og budget. Magbabalaud ang trabaho, pero toa nakapukos sa binahinay maka-uulaw dili angay panag-ingnan.