PATAY ang usa ka mag-uuma human gitigbas sa tag-iya sa iro sa iyang silingan, alas 11:30 sa gabii, niadtong Biyernes, Oktubre 2, sa Purok Malinawon, Barangay Mapawa, Maragusan, Davao de Oro.
Dead on arrival sa Davao de Oro Provincial Hospital sa Maragusan ang biktima nga si Marvin Romero Sabedra, 25, ulitawo, mag-uuma ug molupyo sa nahisgutang dapit.
Subay sa report, ang biktima gitigbas sa suspek nga si Lloyd Villaganas, 38, ulitawo, laborer, nagpuyo sab sa dapit kinsa giingong naaburido dihang giingnan siya sa biktima nga maayong ikulong ang iro kay kanunay siyang paghuton.
Migula sab sa imbestigasyon nga daghan nang higayon nga nalisang ang biktima dihang sa pag-agi niya sa balay sa suspek, aksyonan kini’g paak sa iro.
Miabot na sa punto nga gisultihan sa biktima ang tag-iya, apan nasuko kini ug mikuhag sundang dayon gitigbas sa biktima tumong sa liog.
Tungod sa kadako sa samad-tinigbasan, naukab ang liog sa biktima ug daling gidala sa ospital apan patay na kining nahidangat.
Dali sab nga misibat ang suspek human sa hitabo nga mao karon ang giukoy sa kapulisan sa Maragusan Municipal Police Station.