Ormoc City, Leyte - Gimando ni Ormoc City Mayor Richard Gomez ang pag-lockdown sa Ormoc District Hospital (ODH) human tulo ka mga nars ang nagpositibo sa coronavirus disease 2019 (Covid-19).
Matod ni Gomez, usa ka nurse ang nataptan gikan sa Hilongos, Leyte human nitambong og usa ka selebrasyon.
Pagbalik niini sa iyang trabaho sa ODH, nagpakita na kini og sintomas sa Covid-19 hinungdan nga gikuhaan kini og swab samples.
Nagpositibo kini sa Covid-19 ug dunay 11 ka closed contact sa mga nars nga gikuhaan usab og swab samples. Gi-isolate dayun ang nurse lakip na ang mga closed contact niini.
Martes sa buntag, Septiyembre 29, nipatawag og usa ka emergency meeting si Gomez uban sa mga sakop sa Covid-19 Task Force.
Gikonsiderar sa Task Force nga critical zone ang ODH diin walay bisan kinsa nga makasulod ug makagawas.
Gipamutangan dayun og upat ka command posts ang palibot sa ODH aron ma-regulate ang pag-agi sa mga sakyanan.
Ang mga tawo nga dunay ihatud nga pagkaon ug gamit, kutob lang sa kordon o yellow caution line sa ODH.
Ang mga pulis na ang mohatud niini sa ilang hatagan.
Gimandoan usab ni Gomez ang City Social Welfare and Development Office (CSWDO) sa paghatag og food packs sa mga tawo nga naa sa sud sa ODH lakip na ang mga nagbantay nga pulis ug barangay tanod.
Matod ni Gomez, 14 ka adlaw ang pag-lockdown sa tambalanan samtang gipaabot nga mahuman ang contact tracing ug mogawas ang tanang resulta sa RT-PCR.
Ang mga tawo nga nagkinahanglan sa serbisyo sa ODH, giabisohan nga moadto lang una sa ubang district hospitals o sa Eastern Visayas Regional Medical Center (EVRMC) aron paglikay sa sakit.