MAKABALIK na ang mga tradisyonal nga jeepney, ang gitawag nga “hari sa karsada,” sa pagbiyahe sa kadalanan sa siyudad sa Sugbo. Kon kanus-a kini mahitabo, wa pay tukma nga petsa nga gihatag ang kadagkoan sa siyudad.
Di sab ang tanan nga public utility jeepney (PUJ) units sa dakbayan ang makabalik sa pagbiyahe. Adunay 5,044 ka mga jeepney nga nagbiyahian sa siyudad sa wa pa ipatuman ang health protocols sa Covid-19 niadtong Marso.
Si Cebu City Councilor James Anthony Cuenco, tsirman sa task force nga giumol ni Cebu City Mayor Edgar Labella nga nagtuon sa pagpabalik sa mga jeepney, niingon nga 1,000 ra ka mga jeepney ang pabalikon pagbiyahe. Di na sila maoy hari sa karsada.
* * *
Asa paingon ang laing 4,044 ka jeepney drivers nga di makabiyahe pagbalik ug nagsalig lang sa pagpamasahero? Mao kini ang pangutana ni Greg Perez, presidente sa Pinagkaisang Samahan ng mga Tsuper at Operator Nationwide (Piston) Cebu.
Kining maong pangutana angay nga tubagon sa gobyerno nasyonal nga sa dugay nang panahon gustong wagtangon ang mga tradisyonal nga jeepney aron pag-iway sa dalan alang sa modernong transportasyon.
Giawhag ni Cuenco ang drivers nga di makabalik sa pagbiyahe nga mo-apply sa jeepney modernization program ug sa ubang mga programa sa Land Transportation Franchising and Regulatory Board (LTFRB). Dunay training aron mahimo silang mga welder.
* * *
Makigtagbo karong adlawa, Oktubre 5, si Cuenco sa mga driver, operators ug uban pang stakeholders sama sa mga sumasakay aron tukion ang mga kondisyon sa LTFRB ug pagpapaminaw sa habig sa mga PUJ driver ug operators.
Matod ni Cuenco, subay sa LTFRB guidelines, ang mga jeepney unit lang nga makapasar sa road worthiness standard ang mamahimong makabalik pagbiyahe. Tan-awon sab ang performance sa mga drayber kon mosunod ba sa mga traffic rule.
Daghan ang mga kausaban nga nahitabo tungod sa Covid-19 pandemic. Kon wa pa kini, maglisod ang gobyerno sa pagpahunong sa pagpadagan sa mga kagangkagang nga mga jeepney. Karon, pabalikon sa pagbiyahe ang mga jeepney, apan di tanan. Di na hari sa karsada ang mga jeepney.