NABANGGA sa railings sa dan Juana Extension sa eskina dan Escar, Barangay Kamputhaw, siyudad sa Sugbo ang sakyanan nga gimaneho sa usa ka pastor kaadlawon sa Dominggo, Oktubre 4.
Ang sakyanan nga gimaneho sa usa ka pastor nga si Ernesto Caballes, 58, mopaingon unta sa lungsod sa San Remegio aron mopahigayon og seremonyas sa bunyag uban sa unom ka mga bag-ong miyembro niini.
Si Patrolman Joel Cabrillos sa Traffic Patrol Group (TPG), usa sa mga niresponde sa dapit nahitaboan, nibutyag nga maayong pagkaguba sa atubangan sa sakyanan tungod sa kakusog sa impact.
Dugang ni Cabrillos nga dili na gyud modagan ang sakyanan nga gituohan nga ang makina niini naapil sa pagkaguba hinungdan nga gibira nalang kini og towing truck.
Luwas ra si Caballes nga daling gidala sa ospital. Apan manubag gihapon sa kadaut sa railings sa dakbayan nga gibutang sa dapit sa Cebu City Transportation Office (CCTO).
Si Caballes sa pakighinabi kaniya sa telepono sa Superbalita Cebu, niangkon nga nakatagpilaw siya samtang nagmaneho ug nakahinumdom na nga nagdrayb diay siya dihang nabangga na sa railings.
Matod niya nga nagpahuway siya karon sa ilang balay tungod sa pagpanakit sa iyang lawas human sa pagkabangga. Moabot usab sa 12 ka tahi ang iyang naangkon sa iyang suwang dihang nasamad sa aksidente.
Dugang ni Caballes nga sa iyang pagdrayb kagahapon sa kaadlawon, ang iyang hunahuna nga padayon lang gihapon siyang nagdrayb apan nakapiyong diay ang iyang mata ug diha nakamatngon sa pagkabangga na.
“Kuwang ang akong tulog gud alas 11 ko natulog unya nakamata alas 3 sa kaadlawon. Namainit lang ko gamay ug nilakaw nako dayon kay nag-apas ko sa oras,” butyag ni Caballes.
Duha unta ka misahan ang ipahagayon sa maong pastor sa duha ka barangay sa San Remegio apan wala madayon.
Si Caballes mihulagway nga ang iyang pagka luwas karon gikan sa pagkabangga, ikaduhang kinabuhi na alang kaniya nga gihatag sa Ginuo ug maayo nalang gani nga nakaampo siya sa wala pa siya molakaw.
Awhag ni Caballes nga susama niya nga mga drayber nga kon magmaneho man gani og sakyanan, mas maayo nga dapat insakto ang oras sa ilang tulog aron dili masusama kaniya nga nakatagpilaw.
Angayan usab nga mag-seatbelt aron dili maunsa tungod kay sa iyang pagmameho, iyang giangkon nga nakalimot kini sa pagtaud sa iyang seatbelt rason nga nasamad ang iyang suwang. (BBT)