GIPAHUNONG sa kagamhanan sa lalawigan sa Sugbo ang padayon nga pagkawot sa Cebu Manila Water Development Inc. (CMWDI) sa duha ka mga atabay niini sa lungsod sa Carmen.
Kini maoy kamandoan ni Cebu Governor Gwendolyn Garcia sa giluwatan nga Executive Order (EO) No. 26 sa Oktubre 2.
Nasagmuyo si Garcia human masayri nga padayong nagkawot ang CMWDI sa duha ka atabay bisan gimandoan na kini pagpahunong atol sa katapusang pulong niini sa Septiyembre 11.
“You were looking at a more friendly time when the perhaps with a change of administration as what had happened before, both wells maybe about to operate again. When we said that is not going to operate, why waste more money of continuing the project itself because you wanted to hit water. You wanted both wells to be ready for operation inspite of my pronouncement that these wells will not operate,” matod ni Garcia pinaagi sa news portal sa Kapitolyo.
Nasayran nga padayon ang pag-drilling sa ikatulo og ikaupat nga atabay sa lungsod sa dihang nag-inspeksyon ang sakop sa Provincial Engineering Office (PEO) sa maong lungsod.
Atol sa laing tigum sa gobernador sa mga opisyal sa Manila Water, nasagmuyo kini nga wa gihapon mopatim-aw sa pipila ka higayon na nga gidapit sa tigum ang top officials sa Manila Water sa Oktubre 1.
Sa maong higayon, gibutyag ni Engr. Rey Mariñas ang pangu sa materials testing and quality control sa hydrology division sa PEO, nga padayon ang drilling sa lugar.
Atol sa tigum sa Septiyembre 1, giangkon ni Constantine Uy regional general manager sa Visayas ug Mindanao sa Manila Water Philippines Ventures nga wa sila makakuha og permit sa konseho sa Carmen, sa hunta probinsyal ug ni Garcia alang sa pagkawot sa unang duha ka mga atabay ug sa laing duha pa.
Matod ni Garcia, ang maong lakang nakalapas sa Joint Investment Agreement (JIA) tali sa Kapitolyo ug Manila Water.
Tungod kay ubos sa kasabutan, surface water lang gikan sa Luyang River ang kuhaan og tubig sa Manila Water ug dili gikan sa deep wells.
Gitahasan sa gobernador ang kagamhanan sa Carmen, kapulisan ug Army sa pagpatuman sa order. (ANV)