LIBOAN ang naapektohan. Nagkapuliki ang mga sakop sa Quick Response Team (QRT) sa City Disaster Risk Reduction and Management Office (CDRRMO) sa dakbayan sa Sugbo sa pagtubag sa alarma sa pagdahili sa yuta ug pagbaha sa mga bukirang barangay sa siyudad kagahapon, Oktubre 4, atol sa pagbunok sa uwan ug kusog nga hangin.
Ang pagdahili sa yuta niigo sa mga sityo sa Maling ug Mawnawan sa Barangay Babag 2 ug sa Sityo Lupa ug Napo sa Barangay Sapangdaku, hinungdan sa pipila ka oras nga natanggong ang mga sakyanan nga moagi sa dapit.
Sa Sityo Napo, usa ka multicab ang naanod apan nakuha ra usab sa mga tawo.
Sa mga nahisgutang barangay, wala hinuon nakalas nga kinabuhi gawas sa duha ka magtiayon nga naangol nga nakaangkon og mga ginagmay nga samad nunot na sa pagkaanod sa baha sa Sityo Maling.
“Katong magtiayon sakay to sa motor. Gibadlong nato sila unta nga dili molahos kay kusog ang agos sa tubig. Pero nilahos gyud, maayo nalang nga natabang ra ug na-rescue sa atong QRT,” matod ni Ramil Ayuman, pangu sa CDRMMO.
BAHA
Samtang nagpadayon pa ang pag-account sa mga sakop sa CDRRMO kon pila gyud ka mga balay ang nangaguba ug kon pila ka balay lakip na ang mga pamilya nga apektado sa Barangay Pulangbato ug Bacayan.
Si Ayuman mibutyag nga sa Barangay San Jose pa ang iyang nadawat nga ihap atol ning pagsuwat sa mga balay nga nangaguba tungod sa pagsaka sa tubig sa baha diin sa Purok 5 moabot na sa 185 ka mga tawo ang nangaapektuhan, 36 ka pamilya ug unom ka balay ang nangaguba.
Samtang sa Purok 1 sa susamang barangay, anaa sa 144 ka indibidwal ang apektado, 33 ka panimalay ang nasudlan sa tubig ug tulo niini ang dili na mapuslan.
Sa kinatibuk-ang ihap sa Baranagay San Jose lang, moabot sa 329 ka indibiduwal ang naapektohan samtang 69 ka mga balay ang nasudlan sa tubig baha. Unom niini ang dili na mapuslan.
Si Sapangdaku Barangay Captain Jovie Ladrazo nga nahinabi sa Superbalita Cebu, niingon nga ang Sityo Lupa, Casili ug Baksan mao ang mga sityo sa iyang barangay nga ilang gi-monitor kon mobundak ang kusog nga ulan tungod kay kini nga mga sityo modahili dayon ang yuta.
Si Ladrazo nangayo og tabang sa kagamhanan sa siyudad nga unta maputol na ang mga sanga o mga punoan sa Sityo Lupa nga nagbitay na tungod maoy ilang napanglantawan nga hinungdan nga dali dayon mangahagbong ang yuta tungod siguro sa kabug-at na sa mga sanga nga nakakapyot niini.
Dugang ni Ladrazo nga usa sa ilang himuon nga pamaagi sa kasamtangan nga kon mobundak na gani ang uwan, magtahas kini og duha sa iyang mga sakop nga magpulihay nga maoy magbantay duol sa dapit aron maoy mopahibalo sa mga lumalabay nga dili una paagian ang maong lugar.
Sumala sa Philippine Atmospheric, Geophysical and Astronomical Administration (Pagasa) Mactan, pasado alas 11:00 sa buntag kagahapon, ang dakbayan sa Sugbo nakasinati og katag-katag nga pag-ulan inubanan sa makusog nga hangin.
Matod ni Jhomer Eclarino sa Pag-asa Mactan, kon nagpadayon ang ingon niadto nga pagbundak sa ulan nga may dala nga kusog nga hangin nga molanat ngadto na sa duha ka oras, peligro na kini kaayo.
Ggipahimangnuan gihapon ang mga Sugboanon nga dili gihapon magkompiyansa tungod kay dunay tsansa nga ang dakbayan makasinati pa gihapon sa maong lakaw sa panahon nunot na sa low preassure area (LPA).