MGA sakop sa usa ka drug group nga gipangulohan sa usa ka piniriso sa Cebu City Jail ang nasikop sa kapulisan sa siyudad sa Sugbo atol sa buy-bust sa Lunes sa buntag Oktubre 5, 2020 sa Fatima Homes, Barangay Inayawan, Siyudad sa Sugbo.
Ang duha nakuhaan og unom ka kilos sa gidudahang high grade nga shabu nga adunay kantidad nga P41,480,000.
Ang nadakpan giila nga silang Reynaldo Si-it Atillo, 47, taxi driver ug iyang kauban nga si Reynante Cabije Tacatani, 36, mekaniko.
Unang nadakpan si Atillo nga nakuhaan og usa ka kilo nga mokantidad og P6,800,000.
Apan sa follow up operation, ilang nasikop si Tacatani nga nakuhaan og lima ka kilo gikan sa iyang posisyon.
Migawas ang ngalan ni Atillo sa Talamban Police Station nga ang supply sa illegal nga drugas moabot sa mga barangay nga ubos sa ilang hurisdiksyon.
Matod ni Police Captain Jonathan Bethooven Taneo, hepe sa Talamban police station, nga human nila makuha ang tanang impormasyon, nakig- alayon dayon siya sa hepe sa Pardo Police Station, Police Major John Kareen Escober.
Sa dihang iyang nasiguro nga adunay daghang supply sa drugas nga naabot sa ilang target, gilusad dayon ang buy-bust.
Si Police Brigadier General Albert Ignatius Ferro, hepe sa Police Regional Office 7, nagkanayon nga gibutyag nila ni Atillo ug Tacatani nga aduna silay contact sa sulod sa Cebu City Jail nga maoy mo facilitate sa supply sa illegal nga drugas nga ginganlan og “Jao”.
Si Jao ang motawag kanila nga ang iyang tawo adunay kinilo sa illegal nga drugas nga maoy mo dala niini sa ilang balay sa Inayawan diin sila na usab ang moapod-apod sa mga street pusher sa kabarangayan sa dakbayan ug lalawigan sa Sugbo.
Dugang ni Ferro nga si Jao ang gitawag nga “ring leader” sa sindikato sa illegal nga drugas sa Central Visayas.
Bisan naa kini sa sulod sa bilanggoan, nagpadayon ang iyang transaksyon sa illegal nga drugas.
“Si Jao is a ring leader of this drug trafficking syndicate wherein Jao, who is still in the jail do the transaction,” matod ni Ferro.
Gihulagway ni Ferro nga “high grade” ang shabu nga nakuha sa iyang mga sakop tungod sa packaging niini nga nagpasabot nga imported.
Gipadala ang maong illegal nga drugas gikan sa mga silingang nasud sa Pilipinas ug naabot usab sa dakbayan sa Sugbo.
“Kining mga ing-ani nga packaging is an indicator nga imported. This was smuggled to our country, to be disposed to the different areas in the Philippines,” dugang ni Ferro.
JAIL PABANTAYAN
Tungod sa sunod-sunod nga malampuson nga operation diin ang ilang gipangtug-an nga ang ilang contact naa sa sulod sa bilanggoan, si Ferro niawhag sa jail officers nga pahugtan ang ilang pagbantay sa ilang pasilidad. (AYB, GPL)