SEDC miabag sa 2 ka lungsod

BUGAS, KASANGKAPAN: Gitunol sa mga taga-SEDC ang nga sako sa bugas alang sa mga lumolopyo ug mga gamit alang sa mga frontliners sa mga stakeholder barangays niini sa San Fernando, sama sa (mga hulagway) North Poblacion, Panadyaran, South Poblacion and Toonggo. (Tampo)
BUGAS, KASANGKAPAN: Gitunol sa mga taga-SEDC ang nga sako sa bugas alang sa mga lumolopyo ug mga gamit alang sa mga frontliners sa mga stakeholder barangays niini sa San Fernando, sama sa (mga hulagway) North Poblacion, Panadyaran, South Poblacion and Toonggo. (Tampo)

PADAYONG iabagan sa Solid Earth Development Corp. (SEDC) ang mga lungsod sa San Fernando ug Pinamungahan asa kini namatigayon aron mapaga-an ang mga kalisud ug hagit atol sa krisis dala sa coronavirus disease 2019 (Covid-19).

Una kining mihatag og 60 ka sako nga bugas nga may 50 kilos matag usa pinaagi sa kagamhanan sa San Fernando pagka-Marso tungod sa nakita na’ng da’an nga panginahanglan sa maong kan-unon tungod sa napahamtang na nga kwarentina.

Mitampo sab ang primera kliyente niini, ang Taiheiyo Cement Philippines, Inc. (TCPI), og dugang 50 ka 50-kilos nga mga sinakong bugas nga natunol sab kang Mayor Lakambini Reluya alang sa 21 ka mga barangay sa San Fernando.

“Nalantaw nato nga maglisud ang mga tagilungsod nga makapangita og bugas para sa panimalay ug nga limitado sab gyud ang pangitaanan og panginabuhi-an,” matod ni Mitzie Almira I. Carin, tagduma sa SEDC human resources and administration division.

Sa misunod nga mga semana, mihatag ang kompanya og dugang 105 ka sako sa 50-kilos nga bugas, apan direkta na sa mga nag-abi-abi ug silingang komunidad sa San Fernando, ug dugang managlahing mga inimpakeng pang-alima sa samang mga dapit nga gitunol sa duha ka managlahing kahigayunan.

Midonar pa gyud kini og 50 ka sako sa 50-kilos nga bugas didto sa Pinamungahan, 10 ka sako sa mi-abi-abing komunidad sa Duangan, Lut-od ug Sibago, ug sa silingang barangay sa Anislag ug Guimbawian.

Gitunol sa SEDC ang 10 ka sako sa matag barangay sa Bugho, Magsico, North Poblacion, South Poblacion, Panadtaran, Tañañas, Tinubdan ug Tonggo, ug lima sa barangay Basak, Cabatbatan, Ilaya, Tabionan ug Tubod.

Gitunol ang inimpakeng pang-alima sa susamang 13 ka mga barangay, una sa Abril 21, ug lain sa Mayo 4, matag usa aduna’y maskarang surgical, pangontra’s kagaw sama sa alkohol ug klorin, sabong makapanalipod sa kagaw, mga itlog, ilimnonong tsokolate ug gatas, kape, asukar, mga tasa ug pangkutaw.

Samtang, gihatag sa SEDC ang pipila ka mga kagamitan ngadto sa Municipal Health Office alang sa mga frontliners nga maoy nag-atiman sa mga kompirmado sa CoViD-19, mga persons under investigation (PUI) ug persons under monitoring (PUM) sa kwarentinahan sa lungsod.

Bag-ohay lang gitunol ni Carin ang cover-all suits, surgical face masks, N95 masks, surgical gloves ug face shields ngadto kang Dr. Alcestis Donna B. Azul, ang rural health physician ubos sa Department of Health.

Uban sa pag-abag sa tigsangkap niini nga Triple 8 Resources Development, mipadala ang SEDC og tubig ngadto sa Bugho, Magsico, Tabionan ug Tinubdan sa dihang gipa-ubos ang Sugbo sa enhanced community quarantine (ECQ).

“Sa kainit sa panahon (pag-summer) nga hubas ang mga tinubdan sa tubig, nanangpit ang mga lumolupyo alang sa gikinahanglan nilang tubig alang sa panimalay, bisa’g dili lang-imnon ug pangkaligo, kay tubig para industriya gikan sa planta sa TCPI maoy atong gikuha-an,” miingon si Carin.

Gipadayon sab sa TCPI ug SEDC sa pagtanyag og semento sa mga mihangyo nga mga barangay ug mga tulunghaan atol sa pandemya. (PR)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph