SUPERBALITA CEBU

Lambug beach di na libre

ENTRANCE FEE: Ang publikong Lambug Beach sa Badian nga kanunay duawon sa mga turista di na libre sugod sa Oktubre 5, 2020. Naa na kini entrance fee. (File)

DI NA libre ang pagkaligo sa nabantog na nga Lambug beach sa lungsod sa Badian sugod Oktubre 5, 2020.

Mao kini ang gipahibawo ni Donald Villarin, hepe sa Tourism Office sa lungsod.

Tungod sa padayon nga epekto sa pandemya gumikan sa coronavirus disease (Covid-19) sa kalungsoran sa Lalawigan sa Sugbo, labina sa estriktong pagpatuman sa quarantine protocol, nadesisyonan sa lungsod ang pag-limit sa moduaw sa maong beach ug pagpabayad sa mosuroy.

Gipasabot ni Villarin nga base sa Local Revenue Code, gimando ang pagbayad og entrance fee sa pampublikong beach alang na usab sa maintenance ug pag develop sa lugar ingon man sa mga nag-atiman niini.

“Gipahibalo ang tanan nga ipatuman na ang mandato sa Local Revenue Code sa LGU Badian, ang pagkolekta sa environmental development fees ug user’s fees sa nga dumuduo’ng bisita sa Lambug Public Beach. Kini usa ka paagi sa crowd control ug makakuhag income ang lungsod para magamit sa paggasto sa mga maintenance sa ato’ng tourism destinations,” matod ni Villarin.

Dugang ni Villarin nga bisan sa bayad, makasalig ang mga turista nga luwas ang pagkaligo sa beach.

Ang bayranan nag kantidad lang og P35 sa mga senior citizen, P45 sa local tourists samtang P65 alang sa mga langyaw.

Kon kaniadto moabot sa 150 ka mga turista ang makaduaw sa lugar matag weekdays samtang 300 matag weekend, aron mahasubay sa protocol, gilimitahan na sa 50 porsyento ang kapasidad.

Pagsiguro kini nga di maghuot ang mga tawo. May mga tour guides usab nga magsiguro nga mapahimutang ang mga turista sa ilang cottages.

“Safe na safe pod ang mga guides didto. Sila mopahimutang og asa bakante nga open space cottages. Magbahig sa mga cars nga i-parking. Ang guides ang mosiguro nga magkatag ang mga guest para iwas sa tapok tapok. Para pod naa’y records sa tanang guests kay ilista man sa may checkpoint area ang Ila names, asa sila gikan nga lugar, ug ilang contact numbers,” matod ni Villarin.

Gipahinumdoman sa lungsod ang mga mosuroy nga di pwede nga magdala og ilimnon nga makahubog sa lugar. Ang gitugot lang mao ang pagkaligo, pag-picnic o ang pag-relax.

Giawhag sa lokal nga kagamhanan sa mga konstituwente niini ang pagtinabangay ning panahon sa krisis.

Kini sa paagi nga luwas ug may panginabuhi taliwa sa nasinati nga pandemya.

“Mas i-balance sa amoa ang health and safety ug ang ekonomiya. Need kaayo nga makatabang mi. Ang amo mga constituents nga nagkalisod due to Covid-19,” matod ni Villarin.

Ang Lambug Beach abli kini matag adlaw gikan sa alas 5:00 sa buntag hangtod sa alas 6:00 sa gabii. (ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!