NAG-MESSAGE nako ang award-winning Cebuano composer nga si Jude Gitamondoc nga duna silay gi-released nga kanta sa “Oh! Caraga” in collaboration sa OPM artist nga si Davey Langit, ang grand winner sa Himig Handog P-Pop Love Songs 2016.
Giulohan ni og “Bai,” upbeat ang tempo nga gi-composed ni Jude ug sa Bisrock legend nga si Insoy Ninal nga nanawagan og panaghiusa sa mga Filipino.
Matod ni Jude nga ang mga titik originally inspired sa nahitabong linog sa Cebu ug Bohol niadtong October 2013 apan haum usab sa karon nga pandemya.
Una ning gi-duet nilang Insoy ug Rommel Tuico sa Vispop 2.0 finals night niadtong 2014. Apan karon gikanta sa Vispop band nga “Oh! Caraga” nga gilangkoban nilang Kenneth Corvera, Adam Corvera ug Sherwin Fugoso.
Ang “Bai” gi-record ni Chase Bantug ug mixed ug mastered ni Jad Bantug sa 1032 Studios. Ang track nag-feature nilang Henrick Pestano (keyboards), Ramram Sabanpan (guitars), Clarence Mongado (bass), Jeriel Larano (drums) with additional guitars/arrangement ni Jad Bantug.
Ang debut album sa “Oh! Caraga” nga “Way Sukod” gi-released ubos sa Kadasig niadtong November 2019.
Ang “Bai” ma-download na sa tanang digital platforms sama sa Spotify, iTunes ug Amazon. Ang lyric video sa “Bai” gihimo ni Pepo Daradal ug co-produced sa Grab isip kabahin sa ilang GrabBayanihan campaign nga gi-released niadtong Sabado, Oct. 3 sa Kadasig ug sa Facebook pages sa Oh! Caraga ug Davey Langit.
UNSAY MGA KISAW?
Nag-deadline na niadtong June 23 ang Himig Handog Songwriting Contest sa ABS-CBN apan hangtod karon Oktubre na lang wa gyuy balita kon unsa nay resulta.
Ang Cebu Pop deadline pud karong Oktubre 31. Unsa kaha ilang contest virtual? First time in history kon mahitabo.
Ang Viva duna say search for songwriters diin ang 10 winners makadawat og tag-P100,000 isip advance royalties plus contract. Apan hangtod karon mingaw pa sa tirana ilang studio.
Ang Metro Manila Film Festival deadline sad karong Oktubre 15 sa mga finished film entry. Ang pangutana: Asa man ni ipasalida nga sirado pa man ang mga sinehan? Lisud pa gyud gihapon ang entertainment. Pun-an pa nawa ang ABS-CBN. Puasa gyud tanan.