DAGHAN ang nangreklamo karon nganong nikalit og kamang ang Internet. Di makadawat ang atong kaigsunonan nga wala makaapas ang mga telecom companies sa panginahanglan karong pandemya ug sa pagsugod sa klase.
Gisamotan pa gyud sa mga limitadong work force sa mga tig-ateman sa mga reklamo. Daghan gyud ang saputon.
Apan kon atong tuki-on, ang problema sa Pilipinas mao man gyud ang kakulang sa atong mga cell site. Samot pa karong panahon sa pandemya ug pagsugod sa online classes sa tibuok nasud.
Ako na kining nasulat apan usbon nako karon. Dinhi sa Pilipinas, duna lang kitay 17,850 ka cell site. Apan, 76 milyones ang mogamit sa Internet sa wala pay pandemya ha. Buot ipasabot, naay 4,258 ka users mogamit kada cell site.
Didto sa Vietnam, naa silay 60 milyones nga Internet users. Apan duna man sab silay 90,000 ka mga cell sites. Busa, kada cell site, naa lay 711 ka mga users.
Hunahunaa ang kakusog sa Internet sa ilang lugar. Itandi kini sa atua.
Ang nakadasig lang karon kay human nakig-atubang si Ernest Cu, ang CEO sa Globe Telecom, kang Presidente Rodrigo Duterte mga duha ka bulan nga milabay, nagsugod na og lusot sa mga local government unit (LGU) ang mga permiso nga magtukod og dugang cell site.
Nibuhi og mga pulong si Presidente nga masilotan ang mga opisyal nga maglangay labi na tungod kay mangayog padangog.
Sa miaging bulan, naay inisyal nga 190 ka cell sites ang gitugtan sa tibuok nasud. Karong bag-o, naay laing 200 ka mga cell sites. Makalaom kita nga mahuman kini inig labay sa pipila ka bulan. Ang target nga monindot na ang Internet labing dugay sa Disyembre.
Sa Metro Manila, padayon ang rollout sa paspas kaayo nga 5G. Hinaot sunod niini mao ang Sugbo.
Bisan pa man, nabalaka gyud ko sa mga bata nga nagtungha pinaagi sa distance learning karon. Diri sa balay namo, naa koy high school, college, nag-masters, ug usa ka law student. Magdungan intawon og Zoom. Naa pay mga meeting kaming Doris.
Nag-andam na lang mi og mga prepaid para backup sa panahon nga mapawong ang Internet. Maayo na lang kay naa kitay mapaabot nga paghuman sa mga cell site. Moawhag lang kita nga paspasan kini sa pagtukod.
Sinulog
Unsa kahay mahitabo sa Sinulog 2021 nga padayon pa man ang pandemya? Mag-virtual Sinulog kita? Apan sa dili pa kana madesisyonan, naa pa diay plantsahon nga problema.
Nangimbitar si Vice Mayor Mike Rama og tigum sa Sinulog Foundation Inc. human gilusaw ni Mayor Edgar Labella ang Sinulog Governing Board nga maoy nakalawgaw sa miaging Sinulog.
Apan, naunsa ba nga di na man diay si Rama ang chairman sa SFI karon kay ni-resign man kini siya sa miaging tuig.
(@anol_cebu sa Twitter)