MAUWAW ta. Ang mga kongresista karon sa kongreso mora na og mga celebrity imbis nga public servants, sa inenglis pa. Mora sad og mga dramatorgo sa radio. Si Speaker Alan Peter Cayetano drama kaayo sa iyang speech nga mitunol kunohay sa iyang resignation ngan nga speaker ug drama sad nga wala gidawat sa iyang alalay nga mga kongresista.
Pwera sa maayo, unsaon na lang ning kadaghanan sa mga pulitiko nga kon makatilaw og lami, di na man mobuhi sa pwesto. Pwerte gyud kalami ang posisyon sa Speaker of the House kay bisan sa kasabutan nila ni Cayetano ug Kong. Lord Alan Velasco sa atubangan ni Presidente Duterte kaniadto nga magbahig sila sa termino, si Cayetano di na man mobuhi.
Di ni pagdapig ni Velasco kay primerong butang di man mi kaila, apan ang mga pulong ni Cayetano sa iyang privilege speech human siya motunol sa iyang kunohay resignation, nga unta ang ilang kasabutan sa Oktubre 14 pa man siya motunol sa iyang posisyon ngadto ni Velasco, makalisang alang ni Velasco. Matud pa ni Cayetano di makadaug sa piliay si Velasco ug kon modaug man, dunay posibilidad nga magkudita ang mga kongresista. Pakauwaw man ni sila oy!
Dunay komedya nga ang “gentleman’s agreement” kon sa tagawog pa “usapang lalake” nila ani Cayetano ug Velasco walay pulos kay si Velasco ra man ang lalake. Ang akong mahinumduman nga midangop si Cayetano ni Presidente Duterte sa dihang iyang tan-aw di siya makadaug ni Velasco og magpiliay pagka Speaker of the House mao nga duna silay kasabutan nga magbahig sa termino nga mag-una si Cayetano unya mopuli si Velasco sa Okt.14.
Unsa kahay mahitabo sa Oktubre 14? Atong huwaton ug sundan.
* * *
TRICYCLE. Niadtong panahon nga strikto pa nga gipatuman ang kwarentinas, ang mga tricycle gidid-an og biyahe sa highway. Karon nga modified general community quarantine (MGCQ) na ta mibalik og biyahe ang mga tricycle sa highway bisan pa sa pagdili niini sa Department of Interior ang Local Government (DILG) tungod sa isyu sa safety sa driver ug pasahero. Sa Liloan ug Compostela naay daghan nga nagbiyahe na.
Di ba kaha uwahi na ang lihok sa Cebu Provincial Board sa pagmugna og ordinansa nga magdili sa mga tricycle sa highway? Hinuon, kon ilang ipadayon ang maong balaodnon mahimo ra man na nga ipatoman unya. Apan, kinsa ang mopatuman nga wala na may checkpoint sa pulis karon sa highway human nga MGCQ na ang probinsya? Ang atong Highway Patrol Group (HPG) morag wala na man ko makakita nga nagpatuman sa balaod sa trapiko sa highway.
Kahibawo ta nga ang tricycle panginabuhian. Apan di sad maayo nga iresgo ang kinabuhi sa driver ug pasahero ug anha mobiyahe sa highway. Mahimo ra man sila mobiyahe sa mga dalan gawas sa highway.