DILI malilong nga ang pinakadakong partido politikal sa nasud karon mao ang Partido Demokratiko Pilipino (PDP).
Mao kini ang partido nga nisapnay kang kanhing Davao City Mayor Rodrigo Roa Duterte sa pagdagan niini pagkapangulo niadtong Mayo 2016.
Apan bisan ingon nato nga pinakadako kining partido sa nasud, ang dakong pangutana mao ang kalig-on niini. Dili ikalimod nga daghang mga chapter gikan sa mga rehiyon hangtod sa kalungsuran ang nagkatibulaag ug nag-inilugay sa pwesto.
Wala sila masayod kon kinsa kanila ang giila sa nasudnong pamunoan kay silang tanan lagi mga lider man sa PDP. Daghan sab nga mga miyembro nga nangluod kay gimamit ra daw sila sa panahon sa eleksyon.
May mga opisyales usab nga nanggungis na ug dili mohawa sa pwesto ug nagtukod og laing faction aron maapil sa lista. Busa ang uban, pwera saway, nangwarta na lang sa panahon sa eleksyon, nangolekta og donasyon, pagprinta sa ID ug uban pang paagi nga makakwarta.
Busa sa panahon sa eleksyon, motumaw ang mga lider kuno sa partido. Sa akong paniid dinhi sa Davao City, mabutang nato nga tulo ka klase sa miyembro sa PDP. Una kadtong OK ug abtik pa nga sa akong paniid moabot na lang og 30 porsiyento. Ang ikaduha kadtong hapit nang mangluod nga mokabat og 30 porsiyento, ug ang ikatulo kadtong nangluod na gyod nga moabot og 40 porsiyento.
Ubos niining ihap sa miyembro, moabot og 60 porsiyento ang mga senior citizens samtang 30 porsiyento ang 40-59 anyos samtang 10 porsiyento nga 18-39 anyos. Sa laktod nga pagkasulti, nagkatigulang na ang mga sakop sa partido ug kinahanglan niining modapit sa mga batan-on nga moapil sa partido.
Busa ang interim PDP Davao City Council nga gipamunuan karon ni Atty. Ding Estores isip presidente, ug Nerio Navarro, bise-presidente, nagpahigayon og lakang sa pagpalig-on sa partido.
Karong Oktobre 11, adunay pagabuhatong “rollout” sa bag-ong Module alang sa Basic Membership Seminar (BMS) sa mga bag-o ug Refresher Course (RC) sa mga daang sakop sa PDP sa first congressional district nga gipangulohan ni Condrado Sillada.
Sundan kini sa BMS/RC sa second district nga gipangulohan ni Glen Flores karong Oktubre 25 sa Buhangin. Ang mga daan ug bag-ong sakop sa partido kinahanglang mobalik sa ilang mga barangay aron motukod ug kaugalingong chapters una pa mahatagan og sertipikasyon sa pagka-miyembro og ID sa partido.
Gawas sa mga BMS ug RC, nangandam usab ang Council sa pagahimuong General Assembly sa partido karong Disyembre 2020 aron hingpit nang mapili ang bag-ong sakop sa PDP Davao City Council ug mga pangulo sa komitiba.
Hugot ang determinasyon sa partido nga usbon na ang kinaiya nga daw gigamit lang ang mga sakop sa panahon sa eleksyon kondili maghatag kinig gahom sa katawhan sa pag-usab sa ilang kinabuhi, pamilya ug katilingban sa malinawong paagi.
Dakong duso usab sa partido ang sistemang Pideral nga maoy usa sa mga saad ni PRRD ug ang tinguha nga makabenipisyo ang mga yanong miyembro sa partido ug katawhang Pilipino sa maayong serbisyo gikan sa gobyerno. Sa sunod hugna atong tuki-on ang mabulukong kasaysayan sa PDP.