MALAMPUSON ang unang Dominggo diin gi-implementar ang “no movement policy” sa lukop nga parte sa Digos City niadtong Dominggo, Oktubre 4, 2020.
Kabahin sa guideline number 21 nga gilagdaan ni Mayor Josef Cagas, ang tag duha ra ka pasahero sa mga trisikel nga nagabyahe sa dakbayan mao nga usa ang sakay sa atubangan ug usa sa likod.
Mahimong maapil kadakpan ang pasahero nga mosobra og sakay sa usa ka trisikel ug ang drayber niini.
Gumikan sa lockdown nga ipatuman sa duha ka Dominggo, nahimong mingaw ang dakbayan sanglit sarado ang mga malls, establisemento ug merkado publiko mao nga wa’y nanggawas nga mga indibidwal.
Apektado sab ang turismo sa Barangay Kapatagan sanglit di mahimong makalaag sa ilang mga tourist destinations.
Lunes, balik normal na ang byahe sa mga pampublikong sakyanan ug operasyon sa mga negosyo apan pabiling gipatuman ang mga istriktong minimum health protocols sa dakbayan.
Sa uwahing datos sa City Health Office, misipa na sa 93 ang nataptan og Covid-19 sa dakbayan diin 62 ang nakarekober.
Sa maong ihap, 28 niini ang anaa sa gi-isolate na ug duha ang namatay.