NATIKLO sa hiniusang pwersa sa kapulisan ang usa ka babaye nga nalista isip Top 9 most wanted sa kasong karnaping sa Sulop, Davao del Sur.
Sa gipaguwang taho sa Sulop Municipal Police Station Lunes, Oktubre 5, 2020 gihulagway nga nag-alayon ang ilang sakop sa mga personahe sa Regional Highway Patrol Group, Calinan Police Station, Criminal Investigation and Detection Group (CIDG) ug ubang ahensya sa Davao del Sur Police Provincial Office sa pagsilbi sa orden de aresto, alas 5:10 sa hapon niadtong Oktubre 2.
Nailhan ang suspek nga mao si Helen Montecalvo Masocol, 54, dalaga nga residente sa Purok 6, Barangay Poblacion ning lugar.
Nasikop ang suspek human nasiplatan didto sa Brgy. Riverside, Calinan, Davao City.
Dugang sa taho, nagbutyag nga gikan sa Regional Trial Court Branch 18 ang warrant of arrest nga gipaguwa ni Executive Judge Carmelita Sarno-Davin sa kasong carnapping.
Hinuon, girekomenda sa korte ang pyansa nga P180,000 alang sa temporaryong kagawasan sa suspek.
Apan, napadlak na kini sa selda sa kapolisan ning lugar samtang wa pa’y commitment order ang korte.