CENTRAL MINDANAO -- Dakpan sa mga awtoridad ang notoryus nga lider sa sindikato sa ilegal nga druga alas 12:15 sa kaadlawon kagahapon, Oktubre 6, sa siyudad sa Cotabato.
Giila ang suspek nga si Nasrudin Kasan Roup, alyas Tato Kauting, kinsa nagpuyo sa Purok Dimacaling Boliao 1, Mother Barangay Poblacion sa nahisgutang siyudad.
Gibutyag ni Philippine Drug Enforcement Agency (PDEA) sa Bangsamoro Autonomous Region in Muslim Mindanao (Barmm) Regional Director Juvinal Azurin nga nagpahigayon sila og buy-bust operation uban ang mga pulis ug sundalo duol lamang sa gipuy-an sa suspek.
Sa diha nga akto na nga itunol ni Roup ang shabu sa asset sa PDEA, dali siyang giposasan.
Narekober sa posisyon sa suspek ang 50 gramos nga shabu nga nagkantidad P340,000, usa ka kalibre .45 nga pistola, magazine, mga bala, buy-bust money ug mga personal nga kagamitan.
Gikanayon ni Azurin nga ang suspek gitumbok nga lider sa Roup Drug Syndicate ug gun-for-hire nga dugay na nilang gipanid-an.
Gitakdang pasakaan og kaso ang suspek nga paglapas sa Republic Act 9165 o Comprehensive Dangerous Drug Act of 2002. (Edgar E. Fuerzas)