GIPAHIBAWO sa Southern Philippines Medical Center (SPMC), pinaagi sa infographic, nga ang ilang higdaan sa Intensive Care Unit (ICU) ug ward beds nga gitagana alang sa mga pasyente sa coronavirus disease (Covid-19) okupado na sukad niadtong Lunes, Oktubre 5, 2020.
Sumala pa nga ang ICU beds naa na sa 100 porsyento nga okupado, samtang ang ward beds okupado na og 93.27 porsyento.
Nasayran nga ang higdaan sa ICU mokabat lang og 33 kung diin puno na kini sa mga pasyente sa makatakod nga sakit. Samtang ang ward duna lay kinatibuk-ang 223 ka higdaan kung diin okupado na sab ang 208 niini. Mga pasyente gipangdala sa maong ospital sugod niadtong Hunyo 15 hangtud Oktubre 5 ning tuig.
Sukad niadtong Lunes, ang aktibong kaso sa Covid-19 sa Davao Region moabot na 631 kung diin sa maong gidaghanon, 407 nagagikan dinhi sa siyudad sa Davao.
Hinuon, di tanang pasyente sa maong sakit nasulod sa SPMC. Uban sa mga pasyente, kasamtangan karong gipaestar sa mga temporary treatment ug monitoring facilities dinhi sa siyudad.
Nasayran sa maong infographic nga ang mga positibo sa sakit matag administrative district sa dakbayan mao ang mosunod: Poblacion 483, Talomo 430, Buhangin 367, Agdao 325, Bunawan 131, Tugbok 90, Toril 86, Calinan 34, Marilog 12, Paquibato 11 ug Baguio 8.
Duna say nagpositibo nga di taga Davao apan nia gipahimutang nga moabot og 225.