Hangtod way ordinansa gikan sa lokal nga kagamhanan, di tugotan nga makabiyahe ang mga tricycle, pedicabs ug motorized pedicabs sa nasudnong highway.
Mao kini ang giklaro ni Jhoaden Lucero, direktor sa Department of the Interior and Local Government (DILG) Province atol sa regular session sa Hunta Probinsya sa Lunes, Oktubre 5.
Ubos sa DILG Cricular 2020-036, gidid-an sa pag-operate ang tricycle, pedicabs o motorized pedicabs sa nasudnong kadalanan alang sa kaluwasan sa mga driver ug mga pasahero.
Daghan nang mga aksidente nga nalambigitan sa mga traysikol nga hinay ang dagan samtang nagsubay sa mga karsada.
Apan sa samang memo, mahimo nga makahatag og exception ang Sangguniang Bayan o Sangguniang Panglungsod kon wa nay alternatibo nga rota.
Matod ni Lucero nga ang maong exception kinahanglan nga suportado og ordinansa gikan sa syudad o lungsod ug kinahanglan dunay tricycle route plan (TRP).
“If the LGU doesn’t have the ordinance, that means the general rule still applies. So, kon wala silay ordinance providing for the exceptions, the general rule still applies nga no tricycle is still allowed to ply national roads,” matod ni Lucero sa Oktubre 5 pinaagi sa news portal sa Kapitolyo.
Kon buot sa kalungsoran ug siyudad nga mopabiyahe sa mga tricycle sa kadalanan, mohimo na kini daan sa traffic route plan sa di pa mapupos ang duha ka tuig nga validity sa exception.
“However I would like to emphasize that a route plan has only a two year validity. That means the purpose of that is for the local government to identify already and or prepare or establish construction of alternative route dapat sa two years naa na gyuy agianan ang atong mga tricycles dili na sa highway,”matod ni Lucero.
Subay niini, mipasalig hinuon ang Land Transportation Office (LTO-7) nga di sila manakop sa mga tricycles, pedicab o motorized pedicab basta aduna lay ordinansa gawas lang kon molapas na sa hurisdiksyon sa LGU diin maisip na kining colorum ug mahimong dakpon.
Samtang mipasabot usab ang Land Transporation Franchising and Regulatory Board (LTFRB-7) nga ang maong lakang gibuhat subay usab sa pagtikang na sa modernization.
Gidapit sa Hunta Probinsyal ang naasoyng mga buhatan aron mahatagan og katin-awan ang pagbyahe sa mga traysikol ug pedicab driver sa lalawigan sa Sugbo human mopalabang og mga ordinansa ang Barili ug Toledo City nga naglakip sa rota sa mga traysikol ug pedicab sa mga national highway. (ANV)