WA NAY kinabuhi nga nakaplagan ang 6-anyos nga babaye human mahagbong sa dam didto sa Purok Molave, New Visayas, Sto. Tomas, Davao del Norte.
Sumala pa nga ang biktima nga si Nicole Shane Payawan napalgang patay niadto nang Martes, Oktubre 6, 2020, human nawala niadtong Lunes.
Nasayran nga nagtinabangay ang mga kawani sa barangay, uban sa mga sakop sa 89th Infantry Makatao Battalion sa Philippine Army ug Provincial Disaster Risk Reduction Management Office sa Davao del Norte aron ilusad ang search and retrieval operation apan pakyas sila sa pagluwas sa biktima.
Base sa imbestigasyon sa kapulisan, nasayran nga alas 7 sa buntag niadtong Lunes, ang biktima nananghid nga molaag sa ilang silingan. Apan naabtan na lang og ala 1 sa hapon wa na kini makauli.
Nasayran nga mikuyog diay kini sa iyang mga higala didto sa dam, apan kalit siyang nadakin-as ug nahug sa dam.
Mitunol na og hinabang ang Municipal Social Welfare and Development Office pangulohan ni Mayor Ernesto Evangelista ngadto sa pamilya sa biktima. (Dexter T. Visitacion)