MARKET guard napatay human giambus samtang usa ka konduktor ang nasamdan sa Pikit, North Cotabato alas 10:30 sa buntag Martes, Oktubre 6.
Ang namatay mao si Almonjahid Guiamal, 36, minyo samtang ang samdan giila nga si Tonton Lavarias, 25, ulitawo, pulos molupyo sa Barangay Poblacion, Pikit, North Cotabato.
Sumala kang Pikit Chief of Police Captain Mautin Pangandigan nga sakay ang mga biktima sa usa ka motorsiklo nga nagdagan sa Provincial Road sa Barangay Gli-gli sa nahisgutang lungsod.
Apan kalit lang mitungha ang wala mailhing mga armadong lalaki daplin sa dalan ug gipamusil ang mga biktima.
Daling gihatud ang mga biktima sa nagrespondeng mga pulis ug sundalo ngadto sa Cruzado Medical Hospital, apan gideklara si Guiamal nga dead on arrival samtang grabe ang kahimtang ni Lavarias nga pulos nakaangkon og daghang mga samad pinusilan sa lawas.
Samtang mga armado daling mieskapo paingon sa hilit nga dapit sa Pikit lulan sa usa ka multicab ug duha ka motorsiklo.
Blangko pa ang Pikit Municipal Police Station sa motibo sa pagpangambus sa mga biktima.