‘Dalaw’ sa 30 priso giukoy

SunStar file
SunStar file

ISIP precautionary measure, gipailawom ang tibuok Toril Police Station sa lockdown subay sa pagkompirma ni Davao City Police Office (DCPO) Director Colonel Kirby John Kraft human nga nagpositibo sa coronavirus disease (Covid-19) ang traynta (30) ka mga piniriso.

Pinaagi ni DCPO Spokesperson Police Captian Rosario Aguilar, nagbutyag nga motuman sila sa protocol nga gipahigayon sa health department ning siyudad.

"Mo-abide kita sa protocol na gipahigayon sa health department sa City," ingon ni Aguilar nga nahinabi sa Superbalita Miyerkules, Oktubre 7, 2020.

Una niini, Martes sa gabii, mismong ang City Health Officer Dr. Josephine Villafuerte ang nagkompirma dihang nahinabi kini sa pipila ka mga tigbalita.

Nasayran nga niadtong Oktubre 1, ang 32 ka mga priso sa Toril Philippine National Police (PNP) nakatakda nga ibalhin sa Davao City Jail sa Barangay Maa, apan dunay mga protocol nga kinahanglan masumite, sama sa negative results sa Covid, hinungdan nga gipang-swab test una sila.

Nianang adlawa, gipailawom sa swab-testing ang 32 ka priso didto sa Sta. Ana Testing Center diin Oktubre 2, miguwa ang resulta ug nasayran nga 30 kanila nagpositibo.

Mga nahisgutang priso gipangbalik sa Toril PNP ug gihimo ang makuting pang-quarantine samtang gilusad ang contact tracing sa mga nakadalaw.

"Gipang-quarantine na sila ug ginasunod nato karon ang istriktong health protocols nga ginapatuman sa quarantine alang sa atong mga detainees," ingon ni Police Major Michael Uyanguren, acting station commander sa Toril PNP nga nahinabi sa Superbalita Miyerkules.

Human sa katorse ka mga adlaw, ipang-swab test na sab sila, diin kon magnegatibo na, una pa sila ibalhin sa Davao City Jail nga maoy ilang custodial facility samtang nagdagan ang ilang mga kaso.

Nagpahimangno ang DCPO sa mga kabanay sa priso nga kon nakadalaw una pa man sila gi-swab test, mas maayong mag-quarantine ug kon dunay posibleng simtomas sud sa katorse ka adlaw, mo-report dayon sila sa Barangay Health Emergency Response Team, kinsa mao karon ang mihimo og contact tracing sa mga nakadalaw aron mabantayan ang kahimtang sa ilang panglawas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph