GIAWHAG sa Yaw-Yan Ardigma-Cebu ang mga mahiligon sa paugnat sa kusog partikyular sa mixed martial arts nga magparehistro sa pag-abli og balik sa ilang gym karong adlawa nga nahimutang atbang sa University of Cebu (UC) sa dalan Sanciangko, dakbayan sa Sugbo.
Pwede motawag ang mga interesado sa Yaw-Yan Ardigma pinaagi sa cell number 0943-3658900 o dili kaha sa Facebook page sa Yaw-Yan Ardigma Cebu.
Sulod na sab sa pito ka mga buwan naundang ang operasyon sa Yaw-Yan Ardigma gumikan sa pagkuyanap sa coronavirus disease (Covid).
“Simple gathering sa athletes ang among buhaton,” matod Yaw-Yan Ardigma Cebu founder/CEO Master Benigno”Ekin” Caniga Jr.
“Akong gi-invite ug gi-encourage ang sports and fitness enthusiasts sa pagbalik na og train ug exercise to boost our immune and to get fit. To fight sad against this pandemic is to be healthy and have strong immunity.”
Hugot nga tumanon sa maong gym ang estriktong minimum health protocols nga mao gimando sa Department of Health, Games and Amusement Board (GAB) ug sa Inter-Agency Task Force for the Management of Emerging Infectious Diseases.
Apil sa maong protocol mao ang sanitation sulod sa gym, temperature check sa mga tawo nga mosulod sa gym ug contact tracing list.
“Grateful ko nga nakabalik na’g abli ang contact sports gym nga MGQC gihapon ta karon. Gi-nvite nako ang mga mahiligon sa mixed martial arts, muaythai, kickboxing sports,fitness to join us again in training,” matod ni Caniga.
Si Caniga miingon nga nakadawat sila og advisory gikan sa GAB nga gatugot kanila sa pag-abli sa ilang gym.
Ang dakbayan sa Sugbo gipaubos karon sa General Modified Community Quarantine (MGCQ), ang pinakaubos nga quarantine restriction sa Pilipinas.
Dugang ni Caniga nga maayo nga himsog ang tawo labi na karon nga adunay pandemiya. Ingon niya nga makat-on ang ilang mga estudyante og self-discipline ug confidence kon mosulod sa martial arts.