GIKINAHANGLAN na ang pagdala og quarantine pass sulod sa mga mall o dagkong tindahan sa lungsod sa Sibonga, habagatang Sugbo.
Mao kini ang bag-ong kamandoan ni Sibonga Mayor Lionel Bacaltos sa mga establisemento nga gipaagi sa giluwatan nga Executive Order (EO) No.33 S.2020 sa Oktubre 5, 2020.
Subay sa nadugang nga mga kaso sa coronavirus disease (Covid-19) sa lungsod, gimando sa mayor ang pagbalik sa labing estriktong lagda aron di na mapun-an ang mga kaso.
Aron malimitahan ang gidaghanon sa tawo sa malls ug supermarkets, ang konstituwente lang nga may dala nga quarantine pass ang makasulod.
Di na usab pwede mag suroysuroy sa lungsod kon dili importante ang tuyo sama sa pagpalit og supplies, pag-ehersisyo sayo sa kabuntagon o ba kaha ang pagpanrabaho.
Kinahanglan usab nga kanunayon ang pagsul-ob og mask, face shield ug batasanon ang pag physical distancing aron malikay sa kagaw.
Sa uwahing gidaghanon sa mga nagpositibo, niabot na sa 53 ang nataptan sa sakit. Hinuon 22 niini ang aktibo, 24 na ang naka recover apan upat na ang namatay. Tungod niini gimando usab sa mayor ang padayon nga pag disinfect sa mga establisimento ingon man ang paghinlo sa mga konstituente niini sa kaugalingon. Malaumon ang mayor nga sa maong paagi, di na mapun-an pa ang mga nataptan sa sakit. (ANV)