GIKONSIDERAR sa Police Regional Office (PRO)-7 nga high value indivual sa Central Visayas nga taga Barangay Tisa, Siyudad sa Sugbo, nasikop sa buy-bust sa Martes sa mga pasado alas 19 sa Martes sa gabii, Oktubre 6, 2020.
Ang grupo ni Police Captain Joeffre Grande sa Regional Drug Enforcement Unit (RDEU)-7, kuyog ang mga operatiba sa Regional Intelligence Unit (RIU)-7, nipahigayon og anti-drug operation sa Sityo Mangga, Barangay Tisa.
Giila ni Grande ang ilang nadakpan nga si Paulo Regidor, 23, taga Sityo Riva Ridge.
Laing duha pa ka gikatahapang mga durugista nga nadakpan giila nga sila si Jay Ocaba, 20, taga Sityo Mangga, kanhi service crew ug Samuel Arain, 46, pintor, taga Sityo Capaculan sa samang barangay.
Matod ni Grande nga pila ka dagkong bulto sa shabu ang ilang nasakmit nga mobalor ang tanan og P748,000 ang ilang nasakmit gikan kang Regidor.
Dugang ni Grande nga si Regidor ilang gi-monitor sulod ss usa ka semana una gihimo ang buy-bust.
Si Regidor, sa iyang habig, nihimikak nga iya ang shabu nga nasakmit, apan giangkon hinuon niya nga nadakpan na siya kaniadto sa susamang kaso.
Samtang si Tisa Barangay Captain Reynato “Ringgo” Pacaña nihulagway nga usa si Regidor nga nalista sa ilang Barangay Anti Drug Abuse Council.
Dugang ni Pacaña nga si Regidor nadakpan na kaniadto ug wa siya magtuo nga nibalik sa pagpamaligya og drugas.
Pahimangno ni Pacaña sa mga Tisaanon nga ang iyang buhatan di magpanuko sa pagpasikop sa mga namaligya og drugas sa iyang barangay.